Astanada 11 jasar qyzdyń aýzynda shash óse bastady

<p>ASTANA. KAZINFORM &ndash; Astanada 11 jasar oqýshynyń aýyz qýysynda túk óse bastady. Anasy Aqmaral Shalabaeva bul jaǵdaıdy baıqap, dereý dárigerlerge júgingen. Alaıda, mamandardyń ózi qyzdyń erekshe aýrýyna ań-tań bolyp otyr.</p>

Aqmaraldyń aıtýynsha, 2024 jyldyń naýryzyna deıin qyzdy esh aýrý mazalamaǵan, ádetten tys eshteńe baıqamaǵan. Tipti naýryz aıynyń basynda olar tis dárigerine barǵan jáne emdeý kezinde eshqandaı aýytqý bolmaǵan.

«15 naýryzda qyzym tamaǵynyń aýyrǵanyn aıta bastady. Men ony JRVI nemese angına shyǵar dep oıladym. Tamaǵyn teksereıin dep qaraǵanymda qatty tań qaldym. Badamsha bezderinde eki jaǵynan jáne tisteriniń arasynan shash ósip turǵanyn kórdim», - dedi A. Shalabaeva agenttik tilshisine bergen suhbatynda.

Olar dereý dárigerlerge habarlasyp, jedel járdem shaqyryp, ekinshi qalalyq aýrýhanaǵa barǵan.

«Dárigerler de bul qubylysqa tań qaldy, degenmen barlyq túkti pıntsetpen alyp tastady. Árıne qyzyma azdap qolaısyz boldy. Keıin biz kóptegen memlekettik jáne jeke klınıkalardyń dárigerlerine bardyq, onda bizge synamalar men tekserýlerdiń úlken tizimin berdi», - deıdi Aqmaral.

Óz kezeginde Astana qalasynyń Densaýlyq saqtaý basqarmasy patsıentke otorınolarıngolog, endokrınolog jáne basqa da beıindi mamandardyń tekserýleri, konsýltatsııalary ótkizilgenin atap ótti.

Elordalyq dárigerler mundaı qubylystyń paıda bolý sebepterin túsindire almaı otyr. Degenmen anasy muny balanyń jeke erekshelikterimen baılanystyrýda.

«Qazir emdeýdiń naqty strategııasy joq, óıtkeni naqty dıagnoz joq, ony anyqtaǵannan keıin biz dárigerler men bilikti mamandardyń kómegimen sheshim qabyldaımyz. Biz barlyq kómekke nemese kásibı keńes alýǵa daıynbyz», - dep tolyqtyrdy A. Shalabaeva.

Aldaǵy ýaqytta qyzǵa kompıýterlik tomografııa jáne jatyr moıny men shap aımaǵynyń magnıtti-rezonanstyq tomografııasy jasalady, sodan keıin dárigerler kelesi emdeý joldaryn bekitedi.