Astana–Almaty jáne ózge 3 avtojol bıyl tolyq ashylady – mınıstr

<p>Jyl sońyna deıin qurylys jumystary júrip jatqan Astana&ndash;Almaty, Atyraý&ndash; Astrahan, Aqtóbe&ndash;Qandyaǵash jáne Taldyqorǵan&ndash;Óskemen avtojoldarynda qozǵalys tolyq ashylady. Bul týraly Kólik mınıstri Marat Qarabaevtyń óńirlerge sapary barysynda belgili boldy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>.</p>

Vedomstvo baspasóz qyzmetiniń málimetinshe, ótken demalys kúnderi Marat Qarabaev Aqtóbe, Atyraý jáne Batys Qazaqstan oblystarynda bolyp, mańyzdy kólik ınfraqurylymy nysandaryn aralap kórdi.

Atap aıtqanda, senbi kúni Kólik mınıstrliginiń basshysy Aqtóbe oblysynyń turǵyndarymen kezdesip, azamattardy jeke qabyldady. Sonymen birge Álııa Moldaǵulova atyndaǵy halyqaralyq áýejaıdyń jáne Aqtóbe men Qandyaǵash temirjol vokzaldarynyń jumysymen tanysyp, «Aqtóbe-Qandyaǵash» jáne «Qandyaǵash-Maqat» avtojoldaryn jańartý jumystarynyń barysyn baǵamdap qaıtty.

Sondaı-aq mınıstr joldardy qaıta qurý jobalarynda kózdelgen 22 jańa kópir men jol ótpeleriniń qurylysyn tekserip, merdiger uıymdarmen birneshe jınalys ótkizdi.

Jeksenbide vedomstvo basshysy Atyraý oblysynyń ákimshilik ortalyǵyn Kaspıı teńiziniń porttarymen baılanystyratyn «Oral-Kaspıı kanalynda» bolyp, Atyraý qalasynyń temir jol beketine bardy. Sonymen qatar «Atyraý-Astrahan» avtojolyn jańartý jumystarymen tanysty.

Dúısenbi kúni mınıstr kúrdeli jóndeýden ótip jatqan Batys Qazaqstan oblysyndaǵy «Kaztalovka–Jánibek–RF shekarasy» jáne «Ónege–Bısen–Saıqyn» avtojoldaryn tekserdi.

«Halyq tarapynan birneshe avtojol jobasyna qatysty alańdaýshylyq týyndap otyr. Olardyń qatarynda, Taldyqorǵan – Óskemen, Astana – Almaty, Aqtóbe –Qandyaǵash jáne Atyraý –Astrahan joldary bar. Bıyl atalǵan avtojoldardyń boıynda qozǵalys tolyq ashylatynyn atap ótkip keledi. Kelesi jyly bul jobalar tolyǵymen aıaqtalyp, halyq ıgiligine paıdalanýǵa beriledi», –dedi mınıstrlik basshysy BAQ ókilderine suhbat barysynda.

Sondaı-aq M.Qarabaev oblys turǵyndary jıi kóteretin «Oral-Kaspıı kanalynyń» túbin tereńdetýge qatysty suraqqa jaýap berdi.

«Biz oblys ortalyǵynan ótip jatqan Oral ózeniniń Kaspııge quıatyn jerinde jumys júrgizýimiz kerek. Tıisti bıýdjettik ótinimdi Premer-Mınıstr qoldady. Sondyqtan biz tereńdetý qajet jerlerdi kórýge keldik. Olardyń jalpy uzyndyǵy 11 shaqyrymdy quraıdy. Bıyl jáne keler jyly atalǵan basseındi sáıkestendirý boıynsha úlken jumystar bastalady», - dedi mınıstr.