Astana jastaryna túrli sala boıynsha tegin keńes berildi

ASTANA. QazAqparat - Astana qalasynda jergilikti atqarýshy organ ókilderiniń qatysýymen qala jastaryna túrli sala boıynsha konsýltatsııalyq kómek kórsetildi, dep habarlaıdy QazAqparat tilshisi.

Sharaǵa Astana qalalyq qoǵamdyq densaýlyq saqtaý basqarmasy, «Azamattarǵa arnalǵan úkimet» memlekettik korporatsııasy, Jumyspen qamtý ortalyǵy, Medıatsııany damytý ortalyǵy jáne Turǵyn úı qurylys jınaq bankiniń ókilderi qatysty.

Sonymen qatar, kásibı zańger men psıholog mamandar jastarǵa tegin konsýltatsııa júrgizdi. Qaladaǵy «Hanshatyr» oıyn-saýyq ortalyǵynda ótken ashyq esik kúninde jastar ózin qyzyqtyrǵan saýaldarǵa jaýap aldy.

«Búgingi ashyq esik kúninde jastardyń barlyq suraǵyna tolyqqandy jaýap berildi. Jastardy negizinen jumysqa ornalasý, halyqqa qyzmet kórsetý ortalyǵynyń qyzmeti, baspana, óz kásibin ashý jáne taǵy basqa máseleler mazalaıdy. Atalǵan shara ótken jyly bastalyp, bıyl óz jalǵasyn tabýda. Ótken jyldyń qorytyndysy boıynsha myńǵa jýyq jasqa keńes berildi. Jáne aldaǵy ýaqytta atalǵan sharany elordanyń adamdar kóp shoǵyrlanǵan oryndarynda ótkize beremiz», - dedi «Astana jastary» memlekettik mekemesiniń basshysy Úkibaı Nurpeıisov.

Onyń aıtýynsha, óńirlerden Astanaǵa nápaqa tabý úshin kelip, bazarda nemese basqa jerlerde júrgen jastar túrli múmkindikterdiń bar ekenin bile bermeıdi. Sharanyń maqsaty - solarǵa qol ushyn sozyp, memleket tarapynan qarastyrylǵan múmkindikti paıdalanýǵa shaqyrý.

Aıta ketsek, Astana qalasy ákimdiginiń «Astana jastary» mekemesi uıymdastyrǵan bul shara «Jumyspen qamtý jáne áleýmettik baǵdarlama jol kartasyn» júzege asyrý aıasynda júrgizilýde.