«Astana - jańa qala» AEA-na on jylda 2 trln. teńge ınvestıtsııa quıyldy -I. Tasmaǵambetov

ASTANA. 29 qarasha. QazAqparat - Astananyń damýy - iri kompanııalardyń kóbeıýi nemese qala aýmaǵynyń keńeıýi emes, ınnovatsııalyq ekonomıka qurýǵa kómektesetin óndiris oshaqtaryn ashýda. Ol ekige bólinýi tıis, birinshisi joǵary tehnologııaly jáne ǵylymǵa negizdelgen óndiris, ekinshisi «jasyl ekonomıka» ustanymyn engizý. Bul ustanym EHRO-2017-ni ótkizetin qalany tańdaý kezinde de basty nazarǵa alynǵan bolatyn.

Bul týraly búgin Astanada ekinshi ret ótkizilip otyrǵan «Smart Astana - 2012» konferentsııasynda Astana qalasynyń ákimi Imanǵalı Tasmaǵambetov aıtty.

«Jasyl ekonomıkanyń» negizgi quramdas bólikterin belsendi túrde birtindep engize bersek, bul jalpy ekonomıkanyń quramyn da ózgertedi. Onyń tujyrymdamasy boıynsha, kómirsýtekterdi qoldanýǵa úlken kólemdegi salyq tólenip, al eńbekke az salyq salynady. Osylaısha, tıimdiligi joǵary tómen kómirtekti ekonomıka barlyq ekonomıka úshin jańa serpin beretin bolady», - dedi ol.

Onyń aıtýynsha, ótken jylǵy konferentsııada «Smart Astana» jobasynyń tujyrymdamasy qabyldanǵan. «Qazirgi ýaqytta Astanada osy tujyrymdama aıasynda birneshe joba júzege asyrylyp, jemisin bere bastady. Atalmysh ilki jobalar áleýmettik salada iske asyryldy. Aldaǵy ýaqytta ınnovatsııalyq tehnologııalardy kommýnaldyq salaǵa engizýdi maqsat etip otyrmyz», - dedi I. Tasmaǵambetov.

Ákimniń bergen aqparattaryna sáıkes, ınnovatsııalyq ekonomıkany qurýda negizgi tetik bolyp tabylatyn «Astana - jańa qala» arnaıy ekonomıkalyq aımaǵyna 2002-2012 jyldar aralyǵynda tartylǵan ınvestıtsııa kólemi 2 trln. teńgege jýyq nemese 13,3 mlrd. AQSh dollaryn quraǵan.
«EHRO-2017 halyqaralyq kórmesin ótkizýge daıyndyq jumystary jańa ınvestıtsııalar tartýǵa, halyqaralyq áýe reısterin keńeıtýge jáne basqa da ınnovatsııalyq jobalardy iske asyrýǵa yqpal etetini sózsiz», - dedi I. Tasmaǵambetov.