«Astana - jańa qala» AEA qurǵan sátten bastap 2 trln. teńge ınvestıtsııa tartyldy - A. Saıabaev

ASTANA. QazAqparat - Indýstrıaldyq parktiń jumys istep turǵan ýaqytynda 2 trln. teńgeden astam ınvestıtsııa tartyldy. Bul týraly «Astana - jańa qala» AEA Ákimshilik basqarmasy» MM basshysynyń orynbasary Arhat Saıabaev arnaıy baspasóz týry barysynda málimdedi.

«Búginde Indýstrıaldyq park nysandarynyń shyǵaratyn ónimderiniń jalpy kólemi 363 mlrd. teńgeden asady. 2010 jyly qurylǵan sátten bastap AEA aýmaǵyna tartylǵan ınvestıtsııanyń jalpy kólemi 2 trln. teńgeden asty. Bul qarajattyń basym bóligi elordanyń sol jaǵalaýynyń jedeldetilgen qurylysyna baǵyttaldy jáne sonyń arqasynda 300-den astam ǵımarat paıdalanýǵa berildi, barlyq osy nysandar tartylǵan ınvestorlardy salyq tóleýden bosatýdyń arqasynda salyndy.

Indýstrıaldyq park aýmaǵynda búginde 58 ınvestıtsııalyq joba, 21 óndiris paıdalanýǵa engizildi, 37-si 2017 jylǵa deıin engiziledi. Túrli baǵa boıynsha shyǵarylatyn ónimniń jyl saıynǵy kólemi 100 mlrd. teńgeden asady. Sondaı-aq 2000-nan astam jumys orny quryldy», - dedi A. Saıabaev.

Sondaı-aq ol Indýstrıaldyq park aýmaǵyna kirý úshin irikteletin nysandar boıynsha ólshemderdi atap ótti.

«Innovatsııalyq quram - №1 ındýstrıaldyq park aýmaǵyna kirý sharttarynyń biri, sondyqtan bul jobalardy tańdaýda óte muqııattyq tanytamyz, tıisinshe olardyń basym bóligi biregeı, jańa óndiris. Ár kásiporyn jańa tehnologııalardy engizip, óz tehnıkasyn turaqty jetildirip otyrady. №1 ındýstrıaldyq parkti salýǵa respýblıkalyq bıýdjetten 19,5 mlrd teńge jumsaldy - bul jol, jeli, qubyr, kanalızatsııa jáne t.b. Salyq túrinde búginde bıýdjetke 30 mlrd teńge qaıtaryldy, ıaǵnı joba óz-ózin tolyqtaı aqtady deýge bolady», - dedi ol.