«Astana - jańa qala» AEA-ǵa tartylǵan ınvestıtsııalardyń jalpy kólemi 2 trln. teńgeden asty

ASTANA. QazAqparat - 2002-2015 jyldary aralyǵynda «Astana - jańa qala» arnaıy ekonomıkalyq aımaǵyna tartylǵan ınvestıtsııalardyń jalpy kólemi 2 trln. teńgeden asty. Bul týraly búgin QR Prezıdenti janyndaǵy OKQ-da ótken brıfıngte «Astana - jańa qala» arnaıy ekonomıkalyq aımaǵyn ákimshilendirý basqarmasy» memlekettik mekemesiniń basshysy Іlııas Janǵaskın málim etti.

«AEA aýmaǵyna astananyń eki ındýstrıaldy parki kiredi. Indýstrııalyq parkter - bul jeńildikti salyq jáne keden rejimi belgilengen jańa ónerkásiptik aımaqtar. Investorlar korporatıvtik jáne tabys salyǵynan, merzimi 10 jylǵa deıin ýchaskeni jalǵa alý tólemderinen, jer salyǵynan, múlik salyǵynan bosatylady», - dedi ol.

Onyń atap ótýinshe, arnaıy ekonomıkalyq aımaqqa 2002-2015 jyldary aralyǵynda tartylǵan ınvestıtsııalardyń jalpy kólemi 2 trln. teńgeden astam somany quraıdy.

Sonymen qatar brıfıng barysynda «ASTANA INNOVATIONS» AQ basqarmasynyń tóraǵasy Áltaıyr Ýyzbaev elordada tehnologııalyq bıznes-ınkýbatsııalaý jobasyn júzege asyrý aıasynda 16 ınnovatsııalyq jobanyń iske asyrylǵanyn, búginde olardyń basym bóligi naryqqa tabysty shyǵyp, qala bıýdjetin tolyqtyrý ústinde ekendigin atap ótti.