Astana volonterleri úsh kúnde 1 myń otbasyǵa aýyzashar sebetterin taratty

NUR-SULTAN. QazAqparat – Elordanyń erikti jastary pandemııa jaǵdaıynda aýyzashar sebetterin jetkizý jáne koronavırýsqa qarsy vaktsına týraly túsindirý jumystaryna belsendi úles qosyp jatyr, dep habarlaıdy QazAqparat tilshisi.

Astana jastary sońǵy 3 kúnde 1000 otbasyǵa aýyzashar sebetterin jetkizip bergen. Qaladaǵy «DOS» táýelsiz ómir» ortalyǵy múgedekter qoǵamdyq birlestiginiń aýmaǵynda ótken senbilik kezinde «Astana jastary» jastar resýrstyq ortalyǵynyń eriktisi Araılym Saparáli osyndaı málimet aıtty.

«Astana jastary» ortalyǵy 2014 jyldan beri jumys istep keledi. Bizdegi eń úlken baǵyttardyń biri – eriktiler qozǵalysy. Byltyr pandemııaǵa baılanysty tótenshe jaǵdaı jarııalanǵan kezde, odan keıin de vırýspen kúreske turaqty 500 erikti jumys atsalysty. Bulardan bólek 3000 erikti bir rettik sharalarǵa tartyldy. 27 myńnan astam otbasyǵa azyq-túlik sebetterin tarattyppyz. Al 2021 jyldyń basynan beri 80-ge jýyq mutaj adamnyń aýlasyn retteýge kómektestik. Jaqynda ǵana qalada kornavırýsqa qarsy ekpe egý boıynsha túsindirý jumystaryn paraqtaryn taratyp bastadyq», - deıdi erikti top jetekshisi.

Araılym Saparáli jastardy óz qatarlaryna áleýmettik jeli arqyly tartý jolǵa qoıylǵanyn aıtady.

«Atqarǵan sharalardy jelige salǵan saıyn qyzyǵýshylyq tanytyp, suranatyn jastar kóp. Resýrstyq ortalyq aıasynda 29 jasqa deıingi jastarmen jumys isteımiz. Josparlanǵan sharalardyń ańdatpasyn jiberemiz. Sol kezde nıettiler ózderi ún qatady», - deıdi ol.

Oraza kezindegi dástúrli aýyzasharlar indettiń órshýine sebepker bolmas úshin sebetter taratý jolǵa qoıylyp jatyr. Elorda volonterleri bul isten de shet qalmaǵan eken.

«Jyl basynda saılaý naýqandaryna qatysyp, áleýmettik qashyqtyqty saqtaý, karantın talaptaryn oryndaý boıynsha eriktilik kómek kórsettik. Ol úshin bárimizge bir rettik eńbekaqy tólendi. Osydan bir apta buryn Baıqońyr aýdanyndaǵy meshitpen birlesip, azyq-túlik sebetterin tarattyq. Al keıingi 3 kúnde «Halyq Bank» qoldaýymen tórt aýdan boıynsha 1000 otbasyǵa aýyzashar sebetterin jetkizip berdik.

Ekpe boıynsha saýda, oıyn-saýyq ortalyqtarynda, halyq kóp shoǵyrlanǵan jerlerde, aıaldamalarda ekpe týraly paraqtar, nusqaýlyqtar taratamyz. Osy sharadan shyǵa salyp, aıaldamalarǵa baramyz», - dedi Araılym Saparáli.