«Astana» ýnıversıtetinde adam quqyqtaryn qorǵaý máselesine qatysty pikirsaıys ótedi

ASTANA. 23 aqpan. QazAqparat - 2012 jylǵy 24 aqpanda «Astana» ýnıversıtetinde Elbasynyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna arnaǵan Joldaýynda kótergen máseleleri boıynsha «Adam quqyqtary - eń joǵary qundylyq» taqyrybymen stýdenttik pikirsaıys klýbynyń alǵashqy otyrysy ótedi.

Pikirsaıys klýbynyń jumysyna Prezıdent Ákimshiliginiń, Adam quqyqtary jónindegi komıssııanyń, halyqaralyq jáne úkimettik emes uıymdardyń, buqaralyq aqparat quraldarynyń ókilderi, «Astana» ýnıversıtetiniń oqytýshylary men stýdentteri qatysady dep kútilýde.

Elimizde básekege qabiletti, jan-jaqty damyǵan, bilikti jas zańgerlerdi daıarlaýǵa erekshe kóńil bólinip otyr. Joldaýdyń osy máselege qatysty basymdyǵyn iske asyrý maqsatynda Adam quqyqtary jónindegi komıssııa men Astana ýnıversıteti stýdentterdiń bilimin, biliktiligin kóterý úshin pikirsaıys klýbyn qurǵan bolatyn.

Qatysýshylar Qazaqstannyń adam quqyqtaryn saqtaý men qorǵaýda jáne elimizde demokratııalyq negizderdiń irgetasyn qalaýda jetken jetistikterin talqylaıdy.

Qazaqstan ratıfıkatsııalaǵan Azamattyq jáne saıası quqyqtar týraly, Ekonomıkalyq, áleýmettik jáne mádenı quqyqtar týraly paktiler jáne BUU-nyń adam quqyqtary salasyndaǵy basqa da sharttary elimizdiń ulttyq zańnamasynyń ajyramas bir bóligi bolyp sanalady.

Qazaqstandy álem elderi naryqty ekonomıkasy damyǵan, demokratııalyq úrdisterdi qarqyndy iske asyryp jatqan, adam quqyqtary men bostandyqtaryn joǵary qundylyq retinde sanaıtyn el retinde tanyp otyr.