Astana tútinnen qashan arylady

<p>ASTANA. KAZINFORM &ndash; Jyl saıyn jylytý maýsymynda elordany tútin basatyny bar, ásirese ot jaǵatyn jeke sektorlarda. Bul másele qashan sheshiledi? BAQ ókilderi osy saýaldyń jaýabyn QR Premer-Mınıstriniń orynbasary Serik Jumanǵarınnen surady.</p>

«Astanadaǵy jeke sektorlar men qala irgesindegi eldi mekenderdi gazdandyrý júrip jatqanyn buǵan deıin birneshe ret aıttyq. Sondyqtan gaz tartý jumystardyń aıaqtalǵanyn kúteıik, sodan soń jaǵdaı ózgeredi dep oılaımyn», - dep qysqa qaıyrdy Serik Jumanǵarın Úkimet úıinde ótken baspasóz máslıhatynda. 

Sondaı-aq, vıtse-premer elorda men Aqmola oblysynda gaz tartý jumystary belsendi júrip jatqanyn aıtty. 

«Aqmola oblysyna qarasty Aleksandrovka aýyly aýasy las kentterdiń biri. Aýylda osy jazdan bastap gaz tartý jumystary júrgizilip jatyr», - dep aldaǵy ýaqytta bir nátıjesi bolar dep úmit arttydy. 

Eske sala ketsek, elordadaǵy tútin máselesi burynnan qozǵalyp keledi. 2017 jyly Astana qalasynyń ákimi Áset Isekeshev tútin máselesin sheshý joldaryn aıtqan edi. 

Byltyr elordany qoıý tútin basyp, jaǵymsyz ıis jaılaǵan edi. Turǵyndardyń shaǵymynan soń aýa sapasynyń nege buzylǵanyn Qazgıdromet mamandary túsindirdi.