Astana turǵyndaryna energııa úshin tólegen artyq aqshasy qaıtarylyp jatyr

ASTANA. QazAqparat – Astanada prokýratýranyń aralasýyna keıin elektr energııasy úshin artyq tólem jasaǵan turǵyndarǵa aqshalary qaıtarylyp jatyr, dep habarlaıdy QazAqparat QR Bas prokýratýrasyna silteme jasap.

«Bıyl áleýmettik jelilerde elorda turǵyndarynan elektr energııasy úshin joǵary shottar belgilengeni týraly jarııalanymdar jıilep ketti.
Bul másele qala prokýratýrasynda ýákiletti organdardyń, ákimdiktiń jáne qyzmet kórsetýshilerdiń («Astana-AEK» AQ jáne «Astanaenertutyný» JShS) qatysýymen talqylandy.
Anyqtalǵandaı, energııamen jabdyqtaýshy uıymnyń derekterdi qabyldap-jınaqtaýdy tıisti uıymdastyrmaýynan tutynylǵan elektr energııasynyń kólemi durys eseptelmegen.

Kóptegen astanalyqtarǵa ortasha táýliktik kólem eseptelgen.
Osylaısha esepteý quraldarynyń kórsetkishterine sáıkes abonent naqty qabyldaǵan energııa mólsheri úshin energııa tólemin júrgizý týraly Azamattyq kodekstiń 488-babynyń talaptary buzylǵan.
Saldarynan qala turǵyndaryna úlken mólsherde esepshottar kelgen», - delingen Bas prokýratýra málimetinde.

Eske salaıyq, mán-jaıdy anyqtaý úshin qala turǵyndary «Astana-AEK» AQ men «Astanaenergotutyný» JShS-niń tabaldyryqtaryn tozdyrýǵa májbúr bolǵan edi.
«Sany shekteýsiz adamdar tobynyń quqyǵy buzylýyn eskere otyryp, qala prokýratýrasy Bas prokýratýra arqyly Tabıǵı monopolııalardy retteý komıtetine qadaǵalaý aktisin engizdi.
Ýákiletti organ elektr energııasy úshin negizsiz esepteýge jol bergen sýbektilerge tekserý júrgizý týraly máseleni qaraýy qajet. Buzýshylyqtar anyqtalǵan jaǵdaıda zańda kózdelgen den qoıý sharalaryn qabyldaıdy.
Qazirgi ýaqytta «Astana-AEK» AQ birneshe on myńdaǵan abonentke elektr energııasynyń kólemin qaıta bóldi.
Esepteýlerdi túzetý jumystary jalǵasyp jatyr jáne prokýratýranyń baqylaýynda», - delingen vedomstvo málimetinde.

Aıta keteıik, elektr energııasy úshin artyq tólem jasaǵan turǵyndar men mekemeler Tabıǵı monopolııalardy retteý jónindegi qalalyq departamentke óz betimen de júgine alady.