Astana turǵyndary bes jylda MÁMS júıesine 157,8 mlrd teńge aýdarǵan

ASTANA. QazAqparat – 2017 jyldyń shildesinen bıyǵy qarasha aıyna deıingi aralyqta Astana qalasy boıynsha MÁMS júıesine 157,8 mlrd teńge tústi. Bul týraly búgin elordada ótken brıfıng barysynda «Áleýmettik medıtsınalyq saqtandyrý qory» Astana qalalyq fılıalynyń dırektory Nurlybek Qabdyqaparov aıtty, dep habarlaıdy QazAqparat tilshisi.

«MÁMS jarnalary men aýdarymdary Astana qalasy boıynsha 2017 jylǵy 1 shildeden 2022 jylǵy 1 qarashaǵa deıingi kezeńde shamamen 157,8 mlrd teńgeni quraıdy. Bıylǵy qańtardan qarashaǵa deıingi aralyqta elordada mindetti áleýmettik medıtsınalyq saqtandyrý úshin 54,059 mlrd teńgeden astam qarajat aýdaryldy. Onyń ishinde 30,1 mlrd teńge jumys berýshilerdiń aýdarymdary, al 20,2 mlrd teńge - qyzmetkerlerdiń óz jarnalary. Biryńǵaı jıyntyq tólem somasy shamamen 108 mln teńgeni quraıdy. Jeke kásipkerlerdiń jarnalary - 2,05 mlrd teńge, derbes tóleýshilerdiń jarnalary – 469 mln teńge, azamattyq-quqyqtyq shart boıynsha jumys isteıtin qyzmetkerlerdiń jarnalary 1,03 mlrd teńgeni qurady», - dep toqtaldy «Áleýmettik medıtsınalyq saqtandyrý qory» Astana qalalyq fılıalynyń dırektory.

Onyń sózinshe, mindetti áleýmettik medıtsınalyq saqtandyrý júıesine túsken barlyq qarjy Ulttyq bankte saqtalady. Tıisinshe, sol jerden medıtsınalyq qyzmetter aqysyn tóleýge jumsalady.

Buǵan qosa, Nurlybek Qabdyqaparov MÁMS júıesinde elordalyqtardyń 82 paıyzy saqtandyrylǵanyn atap ótti. Sondaı-aq, bıylǵy on aıda 187 myńnan bas shahardyń turǵynyna 13 mlrd teńgeniń dári-dármegi tegin berilgen.