Astana túlekterine «Altyn belgiler» tabystaldy

ASTANA. QazAqparat - Elordalyq 301 túlek «Altyn belgi» ıegeri atandy. Keshe Astana ákimi Áset Isekeshevtiń qatysýymen úzdik mektep bitirýshilerin marapattaý rásimi ótti, dep habarlaıdy QazAqparat.

Astana ákimdiginiń resmı saıtynda málim etilgendeı, bıyl sondaı-aq 373 túlek úzdik attestat  aldy.

Qala basshysy túlekterdi quttyqtaı otyryp, elorda túlekteriniń respýblıkalyq, halyqaralyq olımpıadalar men ǵylymı jobalar konkýrstarynda 281 medal, sonyń ishinde 121 altyn, 66 kúmis, 94 qola medal jeńip alǵanyn atap ótti.

«Bıyl mektepterden daryndy balalar túlep ushýda. Mysaly, Astanadaǵy № 9 «Zerde» daryndy balalarǵa arnalǵan mekteptiń oqýshysy Nurálı Sarbaqyshty birden álemniń 7 ýnıversıteti oqýǵa shaqyrdy. Al Qudaıbergenov Álıhan men Shaıahmetov Erarslan - matematıkadan barlyq halyqaralyq olımpıadalardyń jeńimpazdary. Kemel Nurdáýlet fızıkadan barlyq halyqaralyq olımpıadalarda altyn medal jeńip alǵan. № 60 mektep-lıtseıinde bilim alǵan Vandeıkastel Sıntııa Sýlýý - frantsýz tilinen respýblıkalyq olımpıadanyń altyn medal ıegeri atanǵan. Mundaı aqyldy, myqty oqýshylar sany jyl ótken saıyn artyp keledi. Árıne, bul bizdi qýantady. Biz olardy maqtan tutamyz», - dedi Á. Isekeshev.

Ákimniń aıtýynsha, bıyl suranysy joǵary mamandyqtar boıynsha joǵary oqý oryndaryna 1 myń grant bólinedi. Olardyń ishinde web-dızaınerler, bim-menedjer-jobalaýshylar, IT-mamandar, qurylystaǵy 3D-baspa jobalaýshylary, ınjener-elektronshylar bar.