Astana tórinde bir mezette 3 myń adam Shámshiniń ánin shyrqady
QR Memlekettik Ánuranynyń avtory, qazaq valsiniń padıshasy Shámshi ánderin nasıhattaý maqsatynda uıymdastyrylǵan kontsertke QR Mádenıet jáne sport mınıstri Ashat Oralov, QR Ádilet mınıstri Azamat Esqaraev, QR Indýstrııa jáne ınfraqurylymdyq damý mınıstri Marat Qarabaev, QR Eńbek jáne halyqty áleýmettik qorǵaý mınıstri Tamara Dúısenova men Túrkistan oblysynyń ákimi Darhan Satybaldy, QR Parlamenti men Májilisiniń depýtattary, sonymen qatar Shámshiniń qaryndasy Raıhan Qaldaıaqova men zııaly qaýym ókilderi, astanalyq kórermen qatysty.
Kesh shymyldyǵy Sabyrhan Asanovtyń sózine jazylǵan Shámshiniń «Otyrardaǵy toı» ánimen bastaý aldy. Saltanatty sharany QR Mádenıet jáne sport mınıstr Ashat Oralov ashyp berip, qalyń jurtty Túrkistan oblysynyń 5 jyldyǵymen jáne Shámshi Qaldaıaqov atyndaǵy Túrkistan oblystyq fılarmonııasynyń ujymyn 60 jyldyǵymen quttyqtady. Sonymen qatar óner ordasyna mınıstrlik atynan Alǵys hat tabystady.
Merekelik keshti Aıgúl Imanbaeva men Jandos Óserbaev tizgindedi. Kontsert barysynda fılarmonııa ánshileri daryndy kompozıtordyń halyq júreginen oryn alǵan tańdaýly shyǵarmalaryn orkestrdiń jáne VIA-nyń súıemeldeýimen jandy daýysta oryndady. Sonymen qatar arnaıy karaoke uıymdastyrylyp, ánsúıer qaýym sazgerdiń ómirsheń ánderin qosyla shyrqady. Oǵan qosa, kópshilikke týyndylardyń shyǵý tarıhy tanystyryldy.
Kesh barysynda Qazaqstannyń Halyq ártisi Nurjamal Úsenbaeva, QR Mádenıet qaıratkeri Aıjan Tajenova, «Eren eńbegi úshin» medaliniń ıegeri Narkenje Serikbaeva, QR Mádenıet salasynyń úzdikteri Mamadııar Taýkeev pen Dinmuhamed Baıqoja, Aızada Álimbek, «Eren eńbegi úshin» medaliniń ıegeri Dana Maqataeva, halyqaralyq «Slavıan bazary» festıvaliniń gran-prı ıegeri Rýhııa Baıdýkenova, estrada juldyzdary Ǵazızhan Shekerbekov, «Qazaqstan daýysy» jobasynyń fınalısti Danııar Barys syndy óner ıelerimen qatar, «ıAssy» jáne «Farab» bı ansambli, «Alash» vokaldy aspaptar ansambli, «Súgir» atyndaǵy qazaq ult aspaptar orkestri óner kórsetti.
Aıta keteıik, Shámshi Qaldaıaqov qazaq dalasyna 300-ge tarta án qaldyrǵan. Árbir týyndysy júrek tórinde jattalǵan óner ıesiniń ánderi atalmysh kontsertte jańasha sıpat aldy. Ulttyq rýhanı muramyzdyń ajyramas bóligine aınalǵan uly sazgerdiń esimi qazaq úshin qashan da qasterli. Fılarmonııa ujymy Shámshi ánderine sýsap kelgen astanalyq tyńdarmannyń kóńiline keremet sezim syılap, kóptiń yqylasyna bólendi.