«Astana-Temirtaý» jáne «Astana-Pavlodar» kúrejoldarynda qurylys jumystary bastaldy - QR kólik jáne kommýnıkatsııa mınıstrligi

ASTANA. 22 tamyz. QazAqparat - Qazaqstanda Memleket basshysynyń tapsyrmasyna sáıkes «Ortalyq-Ońtústik», «Ortalyq-Shyǵys» baǵyttary boıynsha jobany júzege asyrý aǵymdaǵy jyly qolǵa alyndy. Qurylys jumystary 2 shilde kúni «Astana-Temirtaý» jáne «Astana-Pavlodar» baǵyttarynda bastaldy.

Bul týraly QR kólik jáne kommýnıkatsııa mınıstrligi Avtomobıl joldary komıteti tóraǵaksynyń orynbasary Sátjan Ablalıev habarlady.

Onyń aıtýynsha, «Astana-Temirtaý» avtojoly alty ýchaskege bólingen. Búgingi kúni Aqmola jáne Qaraǵandy oblystaryndaǵy eki ýchaskede qurylys jumystary júrgizilýde. Qalǵan 4 ýchaske týraly aıtar bolsaq, qazirgi kezde osy ýchaskeler boıynsha jobalaý-smetalyq qujattama (JSQ) ázirlenýde. Bul jumysty qyrkúıek aıynyń sońyna deıin aıaqtaý, al qazan aıynda konkýrs jarııalaý arqyly merdiger kompanııalardy anyqtaýdy josparlanyp otyr. Osy jyly barlyq 6 ýchaske boıynsha merdiger kompanııalar anyqtalatyn bolady.

«Ortalyq-Shyǵys» baǵyty boıynsha qurylys jumystary «Pavlodar-Qalbataý-Semeı» aralyǵynda jáne «Astana-Pavlodar» ýchaskesinde júrgizilýde.

«Astana-Pavlodar» jolynyń ózi 12 ýchaskege bólingenin aıtyp ótken jón. Búgingi kúni merdiger kompanııalar sol 12 ýchaskeniń 2-ýinde jumysty bastap ketti. Atap aıtqanda, Ertis ózeni arqyly ótetin kópir salý jumystary jáne Pavlodar qalasyn aınalyp ótý joly. Bul ýchaskelerde qazirgi kúni qurylys materıaldaryn ázirleý jáne uıymdastyrý jumystary júrgizilýde.

Qalǵan 10 ýchaskeniń jobalaý-smetalyq qujattamasy ázirlenýde. Búgingi kúni Aqmola oblysyndaǵy bir ýchaskeniń, ıaǵnı Astana qalasynan shyǵa beris joldyń qurylysynyń JSQ-sy daıyn. Bul ýchaske boıynsha merdiger kompanııany anyqtaýǵa konkýrs jaqyn kúnderi jarııalanatyn bolady. Merdiger kompanııa qyrkúıek aıynyń sońynda qazan aıynyń basynda uıymdastyrý jumystaryna kirisip ketedi dep josparlanyp otyr.

Qalǵan 9 ýchaskeniń jobalaý-smetalyq qujattamasy jańa qurylys maýsymyna, ıaǵnı 2014 jyldyń mamyr aıyna daıyn bolady. Sondaı-aq, konkýrs ótkizilip, merdiger kompanııalar anyqtalady. 2014 jyly «Astana-Pavlodar» jolynyń barlyq ýchaskelerinde qurylys-montaj jumystary júrgiziledi.