Astana tatamıinde olımpıada chempıondary men júldegerleri óner kórsetedi

<p>ORAL. KAZINFORM &mdash; Erteń, 10 mamyr kúni Halyqaralyq dzıýdo federatsııasynyń kúntizbesine sáıkes Astana qalasynda erler men áıelder arasynda dzıýdodan Qazaqstan Barysy Grand Slam álemdik týrnıri bastalady. Jarys qarsańynda búgin &laquo;Radisson&raquo; qonaq úıinde BAQ ókilderimen baspasóz máslıhaty ótkizildi.</p>

Jıynǵa Halyqaralyq dzıýdo federatsııasynyń referı dırektory Armen Bagdasarov, IJF bas hatshysy Doktor Lıza Allan qatysty. Sondaı-aq jýrnalısterdiń saýaldaryna Qazaqstan dzıýdo federatsııasynyń bas hatshysy Ashat Jitkeev, vıtse-prezıdenti Serikbol Orazalın jáne atqarýshy dırektory Aıbek Imashev jaýap berdi.

Foto: Qazaqstan dzıýdo federatsııasy

«Bizdiń federatsııamyz Qazaqstan Barysy Grand Slam týrnırin ótkizý maqsatynda byltyr 4 jyldyq kelisim-shartqa qol qoıǵan. Bıyl bul jarysty ekinshi márte ótkizip otyrmyz, osyndaı bastamalar elimizde dzıýdo sportynyń damýyna úlken úlesin qosatynyna senemiz. Qazaqstan barysy Grand Slam 2024 jarysyna qatysatyn Qazaqstan quramasynyń 60 paıyzy jastar deýge bolady. Qazirgi tańda quramada býyn almasý júrip jatyr. Tájirıbeli sportshylardyń ornyn jastar basýda. Mundaı iri álemdik týrnırdi óz elimizde ótkizý jasóspirimnen, jastardan eresekterge aýysyp jatqan sportshylarǵa óte úlken múmkindik pen senimdilik, tájirıbe beredi», — dedi S. Orazalın.

Bıyl Astana tatamıinde olımpıada chempıondary men júldegerleri Sone Akıra, Rafael Sılva, Aaron Volf, Idalıs Ortıs, Tsend-Ochır Tssogtbaatar, An Baýl, álem chempıondary men júldegerleri, Grand Slam jáne Grand Prix jarystarynyń jeńimpazdary baq synaıdy. Bul jarysqa álemniń 84 elinen 500-ge jýyq dzıýdoshy qatysady dep josparlanǵan. Jalpy júlde qory –154 myń eýro.

Foto: Qazaqstan dzıýdo federatsııasy

Aıta ketsek, bul jarys — 2024 jylǵy Parıjde ótetin jazǵy olımpıada oıyndarynyń aldyndaǵy sońǵy Grand Slam kezeńi.

Jaqsylyq Úshkempirov atyndaǵy jekpe-jek saraıynda ótetin týrnırge kirý tegin.