Astana tabysty óńirlerdiń kóshin bastady
«Bir jyldyń ishinde elordada syrtqy ınvestıtsııa kólemi 7,4 ese artyp, 101,3 mlrd teńgege jetip otyr. Bıýdjettiń kiris bóligindegi salyq túsimderiniń úles salmaǵy 38,4 paıyzdan 63,3 paıyzǵa joǵarylady. Sońǵy 10 jyldyń ishinde 2017 jyl Astana bıýdjetiniń kirisi úshin rekordtyq kórsetkish boldy. Ol 2016 jylǵy 405,9 mlrd teńgeden 469,4 mlrd teńgege deıin jetti», - delingen taratylǵan málimette.
2014 jylǵa deıin qala bıýdjetin tolyqtyrýdaǵy negizgi kózi transfert bolyp keldi. Onyń daǵdarysqa toly bolǵan 2008 jyly 74,5, al 2014 jyly 55,8 paıyzdy qurasa, salyq túsimderiniń úlesi 40 paıyzdan aspaǵan edi.
«Degenmen, Astananyń bıýdjettik sýbsıdııalaýǵa táýeldiligi tómendep kele jatyr. 10 jyldyń ishinde transfertterdiń salmaǵy 2017 jyldyń sońyna qaraı 48 paıyzǵa deıin qysqardy. Al 2018 jyldyń qańtar-sáýirinde trasfertter ne bári 38,4 paıyz bolsa, salyq túsimderi 63,3 paıyzǵa jetti. Sońǵy jyldary Astana ishki, sonymen qatar syrtqy kapıtal úshin de ınvestıtsııalyq magnıtke aınalyp otyr. 2018 jyldyń qańtar-mamyryndaǵy elordanyń negizgi kapıtalynyń jıyntyǵyndaǵy ınvestıtsııa 335,4 mlrd teńgeni qurady. Bul somanyń ishinde negizgi kapıtalǵa salynǵan syrtqy ınvestıtsııanyń úlesi 30,2 paıyzǵa (101,3 mlrd teńge) teń», - dep atap ótilgen taldaýda.
Elordanyń negizgi kapıtalyn syrttaı qorlandyrýdyń rekordtyq ósimi kóp jaǵdaıda «EKSPO-2017» halyqaralyq mamandandyrylǵan kórmesin tabysty ótkizýmen, sonymen qatar «Astana» halyqaralyq qarjy ortalyǵynyń el ekonomıkasyna ınvestıtsııa tartý jónindegi belsendi qyzmetimen baılanysty.
Sarapshylardyń aıtýynsha, 2017 jyly qarjy ortalyǵy aıasynda 10 elmen memorandýmdar men kelisimderge qol qoıylǵan.
2017 jyldyń qorytyndysynda Astananyń jalpy óńirlik ónimi 5,8 trln teńgeni qurady. Bul bir jyl burynǵy 4,9 trln teńgeden 18,5 paıyzǵa kóp.