Astana sý tasqynyna qanshalyqty daıyn

<p>ASTANA. KAZINFORM &ndash; Byltyr qyrkúıekte Astanada sý tasqyny qaýpi bar ýchaskeler komıssııalyq tekserýden ótip, 20 ýchaske boıynsha aýdan ákimderine qajetti sharalar qabyldaý týraly usynymdar berilgen.</p>

Bul týraly Astana qalasynyń kommýnıkatsııalar qyzmetinde ótken brıfıngide jergilikti tótenshe jaǵdaılar departamentiniń basqarma bastyǵy Baqytjan Máýlenberdıev aıtty.

«Bıyl qańtar aıynda sý tasqynyna qarsy is-sharalar aılyǵy bastaldy. Turǵyn úı sektorynyń turǵyndary qajetti aqparatpen qamtylyp, qaýipti ýchaskelerde 120 reıd júrgizildi. Búginge deıin kommýnaldyq qyzmetter qaladan 6,5 mln tekshe metrden astam qar shyǵaryp, 55 myńnan astam metr aryq-naýa jelisi, 9 myńnan astam metr kollektorlar, 2 myń dana jańbyr qabyldaý qudyqtary tazartyldy», - deıdi spıker.

Belgili bolǵandaı, «Astana Tazalyq» bazasynda kólemi 2,5 myń tekshe metr qum jáne aǵash ınertti materıaldar qory daıyndalǵan. Taǵy 11 myń tekshe metr ınertti materıaldardy jetkizýge kelisimshart bar. Tótenshe jaǵdaı kezińde azyq-túlik pen janar-jaǵarmaı materıaldaryn jetkizýge 12 memorandým jasalǵan. Jalpy sany 2 260 oryndyq halyqty ornalastyrý maqsatynda 7 qonaq úımen memorandýmǵa qol qoıylǵan. 

«Sý tasqyny qubylystaryna jedel áreket etý maqsatynda jeke quramnan 599 adam, 156 tehnıka, 65 motopompa jumyldyrylyp, azamattyq qorǵaý qyzmetteriniń jalpy toby quryldy», - dedi Baqytjan Máýlenberdıev.

Tótenshelikter qala turǵyndaryn úı mańyndaǵy aýmaqtan kósheniń jol boıyndaǵy bóligine qardy ýaqytyly tazalaýǵa, úıden aǵyndy sýlarǵa nemese sý ótkizgish qubyrlarǵa sý burǵyshtar ornatýǵa shaqyrady. Úıdi sý basqan jaǵdaıda iKomek qalalyq monıtorıng jáne jedel áreket etý ortalyǵyna «109» nómiri arqyly habarlasý kerek.