Astana sý qoımasyn jańartý jumystary qolǵa alyndy

ASTANA. QazAqparat – Elorda irgesindegi Astana sý qoımasy jóndeýden ótip jatyr. Bul týraly Astana qalasy Tótenshe jaǵdaılar departamenti bastyǵynyń orynbasary Dastan Aldabekov málim etti, dep habarlaıdy QazAqparat tilshisi.

«Astana sý qoımasynda sonshalyqty apat bolǵan joq. Qazirgi ýaqytta sý qoımasy kontrrettegish rejıminde. Bul degenimiz – qalany sý tasqynynan qorǵaý. Qazir sý qoımasyn jańartý jumysy júrip jatyr. Ákimdikte osy másele qaralyp, qarjy bólý jaǵy sheshiledi. Bıyl kontrrettegishti jańartýǵa aqsha bólinip, atqarylatyn is-sharalar aıasynda Esil ózeniniń arnasyn keńeıtý múmkindigi týady degen oıdamyz. Sonymen qatar, sý tasqynyna qarsy is-sharalar, bógetti nyǵaıtý, tas tóseý jumystary júrgizilmek», - dedi Dastan Aldabekov Astana qalasy kommýnıkatsııalar qyzmeti alańynda ótken baspasóz máslıhatynda.

Eske salsaq, bıyl qańtarda Astana sý qoımasyndaǵy sý qory tapshylyǵyn sheshý máselesi kóterilgen edi. Atalǵan sý qoımasyna Ertis jáne Esil ózeni arqyly qosymsha sý qory jetkiziletindigi aıtyldy. Mamandardyń esepteýinshe, jyl saıyn elorda halqyn sýmen qamtý úshin 95 mln tekshe metr sý qajet.