Astana sporttan álemdik dodalardy ótkizýge yńǵaıly qala - Halyqaralyq dzıýdo federatsııasy

ASTANA. QazAqparat - Qazaqstanda álemdik deńgeıdegi sharalardy ótkizýge halyqaralyq sport federatsııalary úlken senimmen qarap otyr. Bul týraly búgin Aqordada QR Memlekettik hatshysy Gúlshara Ábdiqalyqovanyń Halyqaralyq dzıýdo federatsııasynyń prezıdenti Marıýs Vızerdi qabyldaýy aldynda QR Mádenıet jáne sport vıtse-mınıstri Sáken Musaıbekov málim etti.

«24-30 tamyz aralyǵynda Astanadaǵy «Alaý» muzaıdynynda elimizde álem birinshiligi ótkiziledi. Bul dodaǵa álemniń 140 elinen sportshylar qatysady. Atap aıtqanda, buǵan deıin Qazaqstanda sporttyń ózge túrlerinen de álem chempıonattary ótkenin bilesizder jáne bul jarystardyń uıymdastyrylýy deńgeıi joǵary baǵalanǵan bolatyn. Elbasynyń júrgizip jatqan saıasatynyń arqasynda, sportty damytýǵa nazar aýdarý deńgeıimizdiń nátıjesinde halyqaralyq qoǵamdastyq bizge úlken senimmen qarap otyr»,-dedi mınıstrdiń orynbasary. Onyń sózine qaraǵanda, jeti kúnge jalǵasatyn saıysqa barsha álem elderi men Qazaqstannan jankúıerler kelip jatyr jáne búginde bıletter túgel satylyp ketken eken. Óz kezeginde Halyqaralyq dzıýdo federatsııasynyń prezıdenti Marıýs Vızer osyǵan deıin Astanaǵa birneshe márte saparmen kelgenin jáne shahar qatty unaǵandyqtan álem birinshiligin osynda ótkizýge tańdaý túskendigin atap ótti. «Bul álemdik iri chempıonattardyń biri bolyp otyr, sebebi osynda 900-ge jýyq sportshy qatysatyn bolady. Atap aıtqanda, dzıýdo kúresinen Qazaqstanda ótkeli turǵan álem chempıonaty elderińizde sporttyń bul túriniń damýyna jańa serpin beretindigine senimdimin»,-dedi M. Vızer.