Astana sportshylary Respýblıka kúnine oraı chellendj bastady

ASTANA. QazAqparat – Elordalyq sportshylar Respýblıka kúnine oraı «Qyran elim – Qazaqstanym!» aktsııasyn bastady. Olar «Qazaqstan – Respýblıkam meniń» óleńin oqyp, estafetany Atyraý qalasynyń sportshylaryna tapsyrdy, dep habarlaıdy QazAqparat Astana qalalyq ákimdiginiń resmı saıtyna silteme jasap.

Aktsııa elordadaǵy memlekettik rámizder alańynda bastaldy.

«Memleket basshysy Qasym-Jomart Toqaev zańǵa ózgerister engizip, 25 qazandy ulttyq mereke – Respýblıka kúni dep jarııalady. Biz, Astana qalasynyń sportshylary, Respýblıka kúnin jańa ulttyq mereke retinde atap ótemiz. Osyǵan baılanysty, bizdiń patrıottyq aktsııamyzdy Respýblıka kúnine oraılastyrý týraly sheshim qabyldandy. Bul chellendjdi Atyraý sportshylaryna tapsyramyz. Aktsııa otandyq sportty damytý maqsatynda ótkiziledi. Chellendj tizbek boıynsha elimizdiń ózge qalalary men óńirlerine estafeta retinde beriledi», - dedi Olımpıada chempıony, QR Ulttyq Olımpıada komıteti Bas hatshysynyń orynbasary Serik Sápıev.

Astana qalasy dene shynyqtyrý jáne sport basqarmasy basshysynyń orynbasary Erkeǵalı Korbozovtyń aıtýynsha, is-sharanyń basty maqsaty – patrıottyq sezimdi nyǵaıtý, halyqtyń birligin sporttyq arenada da kórsetý, elimizdiń osy saladaǵy jetistikterin atap ótý.

Jelidegi jeke paraqshada #RespýblıkaKúni, #DenRespýblıkı heshtegterimen beınerolıkter jarııalaýǵa arqyly patrıottyq aktsııaǵa kez kelgen adam qosyla alady.

«Qyran elim – Qazaqstanym!» patrıottyq aktsııasy qazan aıynyń sońyna deıin jalǵasady.

Photo: gov.kz