Astana sammıti uıym tarıhynyń jańa dáýirin ashty – sarapshy pikiri

<p>QR Prezıdenti janyndaǵy QSZI-dyń Azııalyq zertteý bóliminiń aǵa sarapshysy Baýyrjan Áýken Shanhaı Yntymaqtastyq Uıymy sammıti jańa kezeńniń bastamasy bolyp jatqanyn aıtty.</p>

Astanadaǵy sammıt ShYU tarıhynyń jańa dáýirin ashyp jatyr deýge tolyq negiz bar. Atalǵan jıynda strategııalyq turǵydan mańyzdy dúnıelerge kóz salyndy. Energetıka salasynda birqatar qujattarǵa qol qoıyldy, onyń barlyǵy da bolashaqta birtindep óz jemisin berýi qajet.

2024 jyl ShYU-da «Ekologııa jyly» bolyp jarııalanǵanyn bilemiz. Qazaqstannyń uıymǵa tóraǵalyǵy kezinde Almaty qalasy ShYU-nyń Mádenı astanasy atandy. Bunyń ózi qalanyń abyroıyn kóterip, týrızm áleýetin arttyrýǵa septesti. Uıymnyń mádenı-gýmanıtarlyq sala boıynsha jaqsy jumystar atqaryp jatqanyn atap ótý kerek, – dedi ol.

Sonymen qatar sarapshy álemde dúrbeleńder týyp, keleńsiz oqıǵalar kóbeıgen ýaqytta Qazaqstan tatýlyqqa úndeıtin mańyzdy qadamdar jasaı aldy dep sanaıdy.

Álem saıasatynda turaqsyzdyq bolyp turǵan kezeńde kóptegen memleket basshylarynyń basyn qosyp, jańa bastamalarǵa shaqyrý – elimizdiń jahandyq arenada orny erekshe ekenin aıqyndady.

Ásirese elimizdiń ekonomıkalyq turǵydan jetistikterge jetýge múmkindigi bar, sebebi ShYU elderi ózara taýar aınalymyn damytýda, ınvestıtsııalar tartylyp, jobalar qolǵa alyndy. Sammıtten keıin ekonomıkalyq baılanystar nyǵaıaryna senim mol. Sammıt halyqtar arasyndaǵy dostyqtyń nyǵaıýyna, memleketterdiń bir-birine senimi artýyna, Qazaqstannyń bolashaǵyna oń áser etedi, – dep túıindedi Baýyrjan Áýken.