Astana protsesine BUU-nyń arnaıy ókili Geır Pedersen keledi

<p>ASTANA. KAZINFORM &ndash; Syrtqy ister mınıstrliginiń resmı ókili Aıbek Smadııarov Sırııa boıynsha Astana protsesine BUU-nyń osy másele jónindegi arnaıy ókili Geır Pedersenniń keletinin málim etti.</p>

«Astana formatyndaǵy kepilder elderdiń ujymdyq ótinishine sáıkes, 2024 jylǵy 24-25 qańtarda Qazaqstan elordasynda Astana protsesi sheńberinde Sırııa boıynsha HHІ halyqaralyq kezdesý ótedi.

Kelissózderge Reseı, Túrkııa, Iran, Sırııa Úkimeti men Sırııa oppozıtsııasynyń delegatsııalary qatysady. Baqylaýshylar retinde Iordanııa, Irak jáne Lıvan, sondaı-aq, BUU, BUU-nyń Bosqyndar ister jónindegi joǵarǵy komıssarynyń basqarmasy men Halyqaralyq «Qyzyr krest» komıtetiniń ókilderi qatysady dep kútilýde», - dedi Aıbek Smadııarov.

SІM resmı ókili jýrnalısterdiń saýalnamasyna jaýap bere otyryp, BUU-nyń Sırııa jónindegi arnaıy ókili Geır Pedersenniń Astanaǵa kelýi josparda bar ekenin rastady.

Sondaı-aq, ol kezdesý aıasynda qandaı máseleler qaralatynyn atap ótti.

«Aldyn ala kún tártibine sáıkes, Sırııa tóńiregindegi óńirlik ahýaldy damytý, Sırııadaǵy keshendi retteý jónindegi kúsh-jiger, Sırııadaǵy gýmanıtarlyq ahýal jáne janjaldan keıingi qalpyna keltirýge járdemdesý maqsatynda halyqaralyq qoǵamdastyqtyń kúsh-jigerin jumyldyrý jáne taǵy basqa máseleler engizildi», - dedi SІM resmı ókili.