Astana protsesiniń ótken raýndy qaýipsizdik máselelerine arnaldy - sarapshy

ASTANA. QazAqparat - Bitimgerlik - zamanaýı Qazaqstannyń syrtqy saıasatynyń negizgi baǵyttarynyń biri sanalady, onyń kómegimen memleket halyqaralyq shıelenisti jaǵdaılardy retteýge belsendi qatysyp jatyr, dep atap ótti QR Prezıdenti janyndaǵy Qazaqstan strategııalyq zertteýler ınstıtýtynyń ǵylymı qyzmetkeri Qymbat Nurǵalıeva. Bul týraly «QazAqparat» HAA tilshisi habarlady. 

Onyń pikirinshe, Qazaqstan úshin Sırııadaǵy daǵdarysty retteý jónindegi kelissózder júrgizý erekshe mańyzǵa ıe.

«Qazaqstan Prezıdenti Nursultan Nazarbaev Astana alańyndaǵy Sırııa jaıly kelissózderde Túrkııa men Reseı kóshbasshylarynyń bastamalaryn belsendi qoldady. Sırııa shıelenisin retteý boıynsha dástúrli Jenevamen qatar QR astanasyn dıalogtik alań retinde tańdaý - jahandyq bitimgerlik protsesterdegi bedeldi qatysýshy retinde osy memleketti moıyndaǵandyǵyn bildiredi», - dep atap ótti sarapshy.

Nurǵalıeva atap ótkendeı, Sırııa boıynsha kelissózderdiń alty raýndyn Qazaqstan astanasynda ótkizý oń nátıjemen sıpattalady.

«Astana protsesinde Sırııa memleketiniń qarýly oppozıtsııasy men úkimet delegatsııasynyń bir ústelde bas qosýynyń ózi basty jetistikterdiń biri sanalady. Sonyń nátıjesinde qaýipsizdik aımaǵyn qurý týraly memorandýmǵa qol qoıyldy. Ol, óz kezeginde, eldegi zorlyq-zombylyq deńgeıin azaıtyp, jaǵdaıdy turaqtandyrýǵa yqpal etti», - dep málimdedi ol.

«Astana kezdesýi aıasynda Sırııa daǵdarysy boıynsha pikirtalas Jeneva platformasyndaǵy saıası dıalogqa qosymsha kúsh beretinin atap ótý kerek. Budan bólek, Sırııa daǵdarysyn beıbit jolmen retteýdegi Qazaqstannyń qosqan úlesi eldiń halyqaralyq arenadaǵy pozıtsııasyn nyǵaıtady. Aıta ketý kerek, Astananyń dıalogtik alańy úlken áleýetke ıe, ol 2017 jyldyń qazanyna josparlanǵan Sırııa boıynsha aldaǵy kezdesýler aıasynda júzege asyrylatyn bolady», - dep qorytyndylady Qymbat Nurǵalıeva.