Astana protsesiniń kezekti málimdemesi kóńilden shyqty - Bashar Djafarı

NUR-SULTAN. QazAqparat - Astana protsesiniń 13-kezdesýiniń qorytyndy málimdemesi Sırııanyń qazirgi jaı-kúıin anyq kórsetti. Bul pikirdi Sırııa úkimeti delegatsııasynyń basshysy Bashar Djafarı aıtty, dep habarlaıdy QazAqparat tilshisi.

«Kezdesý qorytyndysy boıynsha jarııalanǵan málimdeme saıası mazmuny jaǵynan kóńilimizden shyqty. Ol Sırııanyń qazirgi jaı-kúıin ádil ári anyq kórsetip otyr. Sırııanyń úkimettik delegatsııasy Qazaqstan astanasyna 13-shi ret kelgenine qýanyshty», - dedi Bashar Djafarı elordada Astana protsesiniń qorytyndysyna arnalǵan baspasóz máslıhatynda.

Sonymen birge, sırııalyq delegatsııa jetekshisi Qazaqstanǵa ózderine kórsetilgen qonaqjaılyq pen kelissózder alańyn usynǵany úshin alǵys aıtty.

Aıta keteıik, elordada Sırııadaǵy daǵdarysty retteý boıynsha Astana protsesiniń 13-shi halyqaralyq kezdesýi ótti. Astana protsesi 2017 jyldan beri Qazaqstan Tuńǵysh Prezıdenti Nursultan Nazarbaevtyń qoldaýymen júzege asyrylyp keledi.

Buǵan deıin Astana protsesiniń kepil memleketteri Sırııaǵa gýmanıtarlyq kómekti arttyrý jáne bosqyndardyń qaıta oralýyna jaǵdaı jasaý qajettigin atap ótti. Sırııa máseleleri boıynsha kelesi kezdesý 2019 jyldyń qazan aıynda Nur-Sultan qalasynda ótedi.