Astana protsesiniń kelesi kelissózderi ótetin merzim belgilendi
«Kepilger elder Prezıdent Nursultan Nazarbaevqa jáne qazaqstandyq bılikke Astanada Sırııa jónindegi halyqaralyq 8-shi kezdesýdi joǵary deńgeıde uıymdastyrǵany úshin shynaıy rızashylyǵyn bildiredi. Jáne de Astanada joǵary deńgeıdegi Sırııa jónindegi kelesi halyqaralyq kezdesýdi 2018 jyldyń aqpan aıynyń ortasynda ótkizý týraly sheshim qabyldaıdy», - delingen halyqaralyq kezdesýdiń qorytyndysyna oraı QR Syrtqy ister mınıstri Qaırat Ábdirahmanov oqyp bergen kepilger elderdiń birlesken málimdemesinde.
Sonymen qatar mınıstr bul jolǵy kelissózder raýndy jyldyń sońynda ótip otyrǵanyn jáne bul qorytyndy shyǵaryp, keleshektegi mindetterdi aıqyndaýǵa múmkindik beretinin atap ótti.
«Birinshi kezekte Sırııadaǵy soǵys is-qımyldarynyń 12 aı boıy toqtap turǵandyǵyn atap ótkim keledi. Bul aıtarlyqtaı jetistik. Qazirgi Sırııadaǵy gýmanıtarlyq ahýaldyń qanaǵattanarlyqsyz bolǵandyǵyna qaramastan janjaldy deeskalatsııalaýdyń arqasynda keı jerlerdegi jaǵdaıdyń jaqsaryp kele jatqanyn baıqaýǵa bolady. Degenmen tutqyndardy ózara berý problemasyn qosa alǵanda áli de kóp dúnıeni sheshý qajet. Bizdińshe, bul negizgi máselelerdiń biri», - dedi mınıstr.
Sonymen qatar Qaırat Ábdirahmanov keler jyl protsesstiń barlyq qatysýshylary úshin tabysty bolaryna senim artatyndyǵyn basa aıtty.