Astana protsesine AQSh memlekettik hatshysynyń kómekshisi qatysady

ASTANA. QazAqparat - AQSh memlekettik hatshysynyń Taıaý Shyǵys isteri boıynsha kómekshisiniń mindetin atqarýshy Devıd Saterfıld Sırııa daǵdarysyna qatysty ótetin Astana protsesine qatysý úshin Qazaqstanǵa keledi. Bul aqparatty QR SІM baspasóz qyzmeti rastady, dep habarlaıdy «QazAqparat» HAA tilshisi.

Eske sala ketsek, QR SІM Astana protsesi aıasyndaǵy Sırııajóninde joǵary deńgeıdegi jetinshi halyqaralyq kezdesý 2017 jyly 30-31 qazanda ótetinin jarııa etken bolatyn. Protseste Reseı delegatsııasyna RF Prezıdentiniń Sırııa jónindegi arnaıy ókili Aleksandr Lavrentev, Túrkııa delegatsııasyna syrtqy ister mınıstriniń orynbasary Sedat Onal, Iran delegatsııasyna syrtqy ister mınıstriniń orynbasary Hýseın Djaberı Ansarı basshylyq etpek.

«Іs-sharanyń bastalýyna bir kún deıin kepilger-elderdiń ókilderi sarapshylar deńgeıinde ekijaqty jáne úshjaqty konsýltatsııalar ótkizýge nıetti. Jalpy otyrys barlyq taraptyń qatysýymen 31 qazanda ótedi», delingen mınıstrliktiń baspasóz málimetinde.

Vedomstvanyń habarlaýyna qaraǵanda, kezdesý Sırııada urysis-qımyldaryn doǵarý rejımin nyǵaıtý boıynsha qol jetkizilgen nátıjelerdi saqtaýǵa, sondaı-aq daǵdarysty saıası retteýge ótý kezeńinde atalǵan eldegi jaǵdaıdy ári qaraı turaqtandyrý sheńberinde kúsh-jigerlerdi arttyrýǵa baǵyttalǵan.