Astana protsesi Jeneva kelissózderiniń tabysty bolýyna jol ashady – BUU Bas hatshysy

ASTANA. QazAqparat - Nıý-Iorkte 28 sáýirde Birikken Ulttyq Uıymynyń shtab-páterinde Qazaqstan syrtqy ister mınıstri Qaırat Ábdirahmanov BUU Bas Hatshysy Antonıý Gýterrıshpen júzdesti, dep habarlaıdy QR SІM baspasóz qyzmeti.

Q. Ábdirahmanov Prezıdent N.Nazarbaevtyń BUU Bas Assambleıasynyń 70-shi sessııasy barysynda málimdegen bastamalaryn BUU Hatshylyǵy dáıekti túrde qoldaýynyń mańyzy zor ekenin atap ótti.

  Taraptar halyqaralyq qaýipsizdik salasyndaǵy aǵymdaǵy ahýalǵa baılanysty is-qımyldar boıynsha pikir almasty. Atap aıtqanda, Qaırat Ábdirahmanov Bas hatshyǵa Sırııa boıynsha Astana kelissózder protsesiniń barysy týraly aqparat berdi.  A.Gýterrısh Astana kelissózderi Jeneva kelissózderiniń tabysty bolýyna jol ashady dep sanaı otyryp, bul protsesti tolyq qoldaıtynyn bildirdi. BUU Basshysy Prezıdent N.Nazarbaevtyń kópjaqty dıplomatııadaǵy rólin joǵary baǵalady jáne Qazaqstan ártúrli halyqaralyq protsesterge alań usynyp, óziniń dáneker retinde mindetin oıdaǵydaı oryndap otyrǵanyn atap aıtty.  

 Dúnıejúzilik uıym basshysy Qazaqstannyń Almaty qalasyndaǵy BUU halyqaralyq habyn qurý týraly usynysyna jáne bul úshin el bıligi keń jáne kóp fýnktsıonaldy ǵımarat berip otyrǵanyna nazar aýdardy.

 Kezdesý barysynda A.Gýterrısh Astanada osy jylǵy 8-9 mamyrda ótetin ShYU sammıtine jáne EKSPO-2017 kórmesiniń ashylýyna qatysý nıeti týraly habarlady. Bul Qazaqstanǵa sońǵy jarty jyl ishinde jasalatyn ekinshi sapar ekeni jáne munyń Qazaqstanmen ári Ortalyq Azııa óńiri elderimen yntymaqtastyqqa BUU-nyń basa nazar aýdaratynyn kórsetetini aıryqsha atap ótildi.