Astana protsesi: Sırııa prezıdenti deeskalatsııa aımaqtaryn qurýdy durys dep sanaıdy
Bul týraly TASS agenttigine silteme jasap QazAqparat habarlaıdy.
«Bul aımaqtardy (deeskalatsııa) qurýdaǵy maqsat - azamattyq qoǵamdy qorǵaý jáne ózge provıntsııalardaǵy sekildi sodyrlarǵa úkimetpen bitim jasasýǵa múmkindik berý. Bul - qarýlanǵan adamǵa aqylǵa kelip, óziniń zańdy dárejesin anyqtaýǵa múmkindik. Basqasha aıtqanda, qarýdy tastaǵannan keıin raqymshylyq bolady», - dedi ol.
Sırııa prezıdenti deeskalatsııa aımaqtaryn qurý bastamasyn durys dep sanaıtynyn atap óte kele, naqty nátıjeler bolýy úshin ýaqyt kerektigin málim etti. «Qandaı da bir ýaqyt kútýge týra keledi. Qarýly toptar bul múmkindikti paıdalanady ma, joq pa - bilmeımiz», - dedi Asad.
Aıta keteıik, 4 mamyr kúni Sırııa máselesin retteý jónindegi Astana protsesi barysynda kepilger elder Reseı, Iran jáne Túrkııa Sırııa aýmaǵynda tórt deeskalatsııa aımaǵyn qurý týraly ýaǵdalasty . Naqtyraq aıtqanda, Latakııa provıntsııasynyń jekelegen aımaqtarynda, Alepponyń birqatar óńirlerinde, Hama provıntsııasynda, Homs, Damask/Shyǵys Gýta provıntsııalarynyń jekelegen bólikterinde jáne Deraa men Kýneıtranyń birqatar aýmaqtaryn qamtıtyn óńirlerde qaýipsizdik aımaǵyn qalyptastyrý týraly memorandýmǵa qol qoıyldy.
BUU Bas hatshysy Antonıý Gýterrısh atalmysh ýaǵdalastyqty qoldaıtyndyǵyn jáne onyń el turǵyndarynyń jaǵdaıyn jaqsartý úshin mańyzdy dep sanaıtyndyǵyn atap ótti.
Túrkııa Syrtqy ister mınıstrligi de Astana protsesiniń kezekti raýndy boıynsha málimdeme jasap , onda Túrik eli Sırııa azamattaryn qorǵaý baǵytyndaǵy sharalardy jalǵastyra beretindigin atap ótildi.
Al Sırııa aýmaǵynda deeskalatsııa aımaqtaryn qurý týraly Astanada qol qoıylǵan memorandýmdy júzege asyrý qaǵıdalary men negizgi ahýalyna arnalǵan brıfıngte RF qorǵanys mınıstriniń orynbasary, general-leıtenant Aleksandr Fomın memorandým oppozıtsııany DAISh jáne «Djabhat an-Nýsr» terrorıstik tobynan bólýge múmkindik beretin mańyzdy qujat bolyp tabylatyndyǵyn aıtty.
4 mamyr kúni Reseı Federatsııasy Astana protsesi barysynda qol jetkizilgen atalmysh memorandýmdy qoldaıtyn qarar jobasyn BUU Qaýipsizdik Keńesiniń qaraýyna engizdi.