Astana protsesi: Kepilger elder DAISh toptaryn túpkilikti joıýda seriktestikti jalǵastyrmaq

NUR-SULTAN. QazAqparat - Sırııa máselesi boıynsha Astana protsesindegi kepilger elder - Iran, Reseı men Túrkııa memleketteri Sırııa aýmaǵyndaǵy terorıstik toptardy túpkilikti joıý isin jalǵastyrmaq, dep habarlaıdy QazAqparat tilshisi.

«Kepilger elder Idlıb aýmaǵyndaǵy deeskalatsııa jaǵdaıyn egjeı-tegjeıli qarastyrdy. Sonymen birge 2018 jyldyń 17 qyrkúıegindegi Memorandýmdy oryndaý boıynsha jasalǵan qadamdardy quptaı otyryp, Idlıbtegi jaǵdaıdy turaqtandyrýǵa qatysty kelisimdi tolyq oryndaýǵa daıyn ekendikterin rastady. Onyń ishinde ırandyq-reseılik-túrkııalyq úılestirý ortalyǵynyń birlesken tıimdi qyzmeti men patrýliniń jumysyn úılestirý maquldandy», - dedi QR Syrtqy ister birinshi vıtse-mınıstri Muhtar Tileýberdi elordadaǵy Astana protsesinde kepilger elderdiń birlesken málimdemesin oqı otyryp.

Onyń aıtýynsha, Iran, Reseı men Túrkııa memleketteri «Heıat Tahrır ash-Sham» terrorıstik uıymynyń aýmaqtaǵy baqylaýdy kúsheıtý áreketine alańdaýshylyq bildirýde.

«DAISh-ty, «Djabhat an-Nýsra» men ózge de toptardy, Ál-Kaıda men DAISh-qa qatysty barlyq uıymdardy túpkilikti joıý baǵytynda seriktestik jalǵasady. Ol uıymdardyń barlyǵyn BUU Qaýipsizdik Keńesi terrorıstik uıym retinde moıyndaǵan. Sonymen birge, Idlıb aýmaǵynda buzýshylyqtardy tómendetý boıynsha naqty sharalardy qabyldaý kelisildi», - deıdi Muhtar Tileýberdi.

Eske sala ketsek, búgin elordada búgin Sırııa boıynsha Astana protsesiniń 12-shi raýndy aıaqtaldy.

Kelissózderdiń qorytyndysy boıynsha kepilger elder - Iran, Reseı men Túrkııa birlesken málimdeme jasady. Kepilger elder Sırııaǵa gýmanıtarlyq kómekti arttyrýǵa shaqyryp otyr.