Astana protsesi atysty toqtatýǵa sep bola alady - saıasattanýshy
«Jalpy Sırııadaǵy ahýaldyń qandaı ekendigin barlyǵy da jaqsy biledi. Bul eldegi uzaqqa sozylǵan kıkiljiń tek Taıaý Shyǵystyń ǵana emes, búkil álemniń kúrdeli máselesine aınalyp otyr. Soǵan baılanysty beıbitshilikti ornatý qajettiligi týyndaýda jáne barsha álemdik qoǵamdastyq oǵan kúsh jumsaý ústinde. Kelissózderdiń tórtinshi kezeńine qarýly oppozıtsııa ókilderiniń qatysýyna qol jetkizý barynsha kúrdeli boldy. Bul qazaqstandyq dıplomatııa úshin de, janjaldy retteýge múddeli barlyq taraptar úshin de serpilisti sát bolǵany anyq. Soǵan sáıkes tórtinshi kezeńde eń aldymen taraptardyń kelissózder ústelinde kezdesýi kútilýde. Ásirese qarýly oppozıtsııany Amerıka Qurama Shtattary tarapynan bombalaýdan, reseılik avıatsııalyq áýe soqqysynan keıin ahýal ýshyǵa túsýde. Tolyqtaı alǵanda ózara qarym-qatynastaǵy shıelenisti tómendetý maqsatynda taraptar kúrdeli ahýaldan shyǵýdyń joldaryn qarastyrady dep kútiledi», - dedi Ádil Káýkenov.
Onyń aıtýynsha, barlyǵynyń da Astanada kelissózder ústeline otyrýǵa daıyn ekendikterin bildirýi janjaldasýshy taraptardyń kıkiljińnen shyǵý joldaryn izdeýdi qajet etip otyrǵandyǵyn kórsetedi. Sonymen qatar saıasattanýshy Sırııadaǵy ahýaldy retteýdiń múmkinshiligi áli de bolsa qıyn ekendigin, janjal sozylmaly sıpatqa ıe bolyp otyrǵanyn basa aıtty. Degenmen kelissózderdiń kezekti raýndy atysty toqtatý úshin túsinistik tabýǵa múmkindik beredi.
Aıta keteıik, buǵan deıin 3-4 mamyr kúnderi Sırııa máselesi boıynsha Astanada ótetin kelissózderge sırııalyq qarýly oppozıtsııanyń qatysatynyn habarlaǵan bolatynbyz .