Astana polıtsııasy jaıaý júrginshilerden qulaqqap paıdalanbaýdy ótindi
«Jol-kólik oqıǵalarynyń 20 paıyzy jaıaý júrginshilerdiń jolda júrý erejesin saqtamaýynan oryn alady. Kópshilik jete mán bermeıtin ruqsat etilmegen jerden joldy kesip ótý, baǵdarshamnyń jasyl túsin kútpeı, júrip ketýdiń sońy qaıǵyly aıaqtalyp jatady. Jaıaý júrginshilerdiń qatysýymen 54 jol-kólik oqıǵasy boldy. Onda 43 adam túrli dene jaraqattaryn alsa, 11 adam qaza tapty», - deıdi Astana qalalyq ІІD Jergilikti polıtsııa qyzmetiniń basshysy Baqytjan Malybaev ákimdikte ótken baspasóz máslıhatynda.
Polıtsııa ókiliniń aıtýynsha, jaıaý júrginshilermen aldyn alý sharalary turaqty túrde júrgizilip turady. Olarǵa Jolda júrý erejesi jazylǵan jadynamalar taratylyp, túsindirme jumystary ótkiziledi. Degenmen, jol-kólik oqıǵalarynyń oryn alýyna jaıaý júrginshilerdiń qulaqqappen án tyńdaýy sebep bolatyn kórinedi.
«Jol-kólik apatyna kez kelgen faktor áser etedi. Ásirese, qazirgi jastardyń kópshiligi qulaqqappen án tyńdap, syrtqy álemmen baılanysyn úzedi. Al júrgizýshi kóligin toqtatyp úlgermeıdi. Sondyqtan, qala turǵyndarynan qaýipsizdikke beı-jaı qaramaýdy jáne joldan óterde smartfon men qulaqqapty paıdalanbaýdy suraımyz», - dep túıindedi sózin B.Malybaev.