Astana polıtseıleri esirtki saıttarynyń trafaretshisin ustady

ASTANA. QazAqparat - Astana polıtseıleri esirtki saıttarynyń trafaretshisin jarnamalaý ústinde ustady, dep habarlaıdy Polisia.kz.

Elordalyq polıtsııa qyzmetkerleri esirtki zattaryn jarnamalaıtyn Aqmola oblysynyń 34 jastaǵy turǵynyn ustady. Kúndizgi ýaqytta ol garajdyń qabyrǵalaryna ballonmen graffıtı salǵan.

Tártip saqshylaryna ustalmaı turyp birneshe kún buryn er adam áleýmettik jeliler arqyly esirtkini jarnamalaıtyn saıttardy kórsetetin graffıtı sýretterin salý boıynsha trafaretshi retinde jumysqa ornalasqany anyqtaldy. Jumystyń zańǵa qaıshy sıpatyn bile tura, ol kúndizgi ýaqytta qabyrǵalarǵa jazý jaza bastaǵan.

Alaıda er adam sýret salý kezinde qylmys ústinde polıtsııa qyzmetkerlerine ustaldy. Tekserý barysynda Hyundai avtokóliginiń júksalǵyshynan boıaý ballony men trafaret tabyldy.

Kúdikti kólikti jeke tasymaldaý úshin jalǵa alǵan. Onyń buryn sotty bolǵany anyqtaldy.

Ustalǵan azamat qylmysyn moıyndady.

Atalǵan faktige qatysty QR QK 299-babynyń 1-bóligi boıynsha (Esirtki, psıhotroptyq zattardy nemese olardyń analogtaryn, prekýrsorlardy nasıhattaý nemese zańsyz jarnamalaý) sotqa deıingi tergeý amaldary júrgizilýde.

Jyl basynan beri zańsyz aınalymnan 250 keliden astam túrli esirtki quraldary tárkilenip, 69 esirtki saıty buǵattaldy.