«Astana Opera» teatrynyń dırıjeri Aıdar Ábjahanov «Qazaqstannyń eńbek sińirgen qaıratkeri» ataǵyn ıelendi

ASTANA. 14 jeltoqsan. QazAqparat - Mádenıet jáne aqparat mınıstri Muhtar Qul-Muhammed «Astana Opera» teatrynyń belgili dırıjeri Aıdar Ábjahanovqa «Qazaqstannyń eńbek sińirgen qaıratkeri» memlekettik nagradasyn tabys etti. Atalǵan marapatqa laıyq dep tanylǵan mádenıet, ǵylym, óndiris jáne áleýmettik saladaǵy memleket jáne qoǵam qaıratkerlerin marapattaý rásimi 14 jeltoqsanda Mádenıet jáne aqparat mınıstrliginde ótti.

Sahnada jıyrma jyl eńbek etken Aıdar Ábjahanov, álemniń úzdik teatrlarynda jumys istep, aty ańyzǵa aınalǵan ıtalıandyq La Scala teatrynda tájirıbe jınaqtaǵan. Qajyrly eńbeginiń arqasynda búgin Aıdar Ábjahanov «Qazaqstannyń eńbek sińirgen qaıratkeri» atandy. Dırıjer ataq-dańqty oılamaıtynyn, eger adam súıikti isimen aınalyssa, eshkimnen maqtaý men marapat kútpeıtinin atap ótti. «Sahnaǵa shyqqan saıyn tyńdarmanǵa kompozıtordyń kóńil-kúıin, sezimin jetkizýdi maqsat etip shyǵamyn, eger sol maqsatym iske asyp, kórermen sol tolǵanysty sezinse, kóńilinen shyqsam, men úshin bul kishigirim jeńis. Degenmen, «Qazaqstannyń eńbek sińirgen qaıratkeri» ataǵyn alǵanyma óte qýanyshty ekenimdi moıyndaý kerek. Memleket óner adamynyń jumysyn baǵalap, eńbegińniń beker emes ekenin kórýi - qýantatyn jaǵdaı», - deıdi Aıdar Ábjahanov.

Aıdar Ábjahanov 2013 jyldan bastap "Astana Opera" Memlekettik opera jáne balet teatrynyń dırıjeri. Almatydaǵy Qurmanǵazy atyndaǵy Memlekettik konservatorııasyn támamdaǵan. Keıin Sankt-Peterbordaǵy Rımskıı-Korsakov atyndaǵy konservatorııaǵa oqýǵa túsedi.
Bartok Festival Savaria Symphony (Sombatheı, Vengrııa), Zoltana Peshko master-klasynda, Venadaǵy Vidin Philarmonic Orchestra (Avstrııa) aıasyndaǵy Salvador Mas Konde master-klasyna qatysqan. 2007 jyly A. Ábjahanov La Skala (Mılan, Italııa) teatrynda mashyqtanýdan ótken. 2000-2013 jyldar aralyǵynda - K. Báıseıitova atyndaǵy UOBT dırıjeri.
Qoıýshy-dırıjer retinde iske asyrǵan qoıylymdary: «Şelkýnchık», «Lebedınoe ozero» (P.I. Chaıkovskıı), «Jızel», «Korsar» (A. Adan), «Koppelııa» (L. Delıb), «Esmeralda» (Ts. Pýnı), «Sılfıda» (H. Levenshold), «Shopenıana» (F. Shopen), «Karnaval» (R. Shýman), «Polovetskıe plıaskı» («Knıaz Igor» operasy, A. Borodın). «Baıaderka», «Don Kıhot» (L. Mınkýs) jáne t.b.