«Astana Opera» teatrynyń balet ártisteri Avstralııada óner kórsetti
«Ballet International Gala» atty álemdik deńgeıdegi gala kontsertinde óner kórsetýge Ortalyq Azııa elderinen Qazaqstan ǵana shaqyrtý alǵan. Bizdiń ártister 26 qańtar men 5 aqpan aralyǵynda Avstralııanyń 2 qalasynda bolyp, ónerlerimen tánti etken.
«Ballet International Gala» birinshi ret uıymdastyrylyp otyr. Jáne bul halyqaralyq deńgeıdegi shara. Biz arnaıy shaqyrtý aldyq. Áriptesim Shuǵyla ekeýmiz barlyǵy 8 qoıylym usyndyq. Biz «Spartak» baletin qoıdyq. Kórermenderge óte unady, sebebi Spartak baleti kópke tanymal jáne ol mýzykasymen erekshelenedi. Ókinishke qaraı, baletti tolyqtaı kórsetý múmkin bolmady. Sebebi karantınge baılanysty adam sany shekteýli, ıaǵnı búkil qurammen bara almadyq. Biz úzindi kórsettik», - dedi Baqtııar Adamjan.
Onyń aıtýynsha, balet óneri boıynsha qazaqstandyq ártister Avstralııa sahnasynda alǵash ret óner kórsetti.
«Árıne, biz gastrolmen biraz elde boldyq. Onyń ishinde Eýropa elderi de bar, AQSh, Qytaı jáne taǵy basqa. Al Avstralııada Qazaqstan atynan birinshi bolyp óner kórsetip otyrmyz. Bul biz úshin qýanyshty jaǵdaı. Sebebi bizdiń ónerimiz tanyla túsýde. Aıtýly sharaǵa álemniń men-men degen ártisteri men balet óneriniń maıtalmandary qatysty. Jalpy Avstralııa halqy bizdi jyly qarsy aldy. Jáne aldaǵy ýaqytta taǵy da Avstralııaǵa shaqyrtý aldyq», - deıdi ol.
Sondaı-aq, qazaqstandyq ártisterdiń óneri týraly jergilikti óner sholýshysy Fıl Braýn The Courier Mail gazetinde maqala jaryq kórgen.
«Avstralııa sapary men úshin erekshe ótti. Sebebi kúptegen óner sapary boldy. Ol jaqtyń halqy, ómir súrý deńgeıi men ónerge degen qyzyǵýshylyqtary basqasha. Sapar barysynda sheteldik áriptesterimizben jaqyn tanysyp, dostasyp ta aldyq. Alǵash sahnaǵa shyǵarda azdap qobaljý boldy. Degenmen biz bul saparǵa jaqsylap daıyndaldyq. Avstralııalyqtardy óz ónerimizben tánti ettik degen senimdemin», - dedi Shuǵyla Ádephan.