«Astana Opera» teatrynda ulttyq klassıka murasy «Birjan – Sara» sahnalanady

NUR-SULTAN. QazAqparat - «Birjan – Sara» operasyna bıyl 75 jyl. Osyǵan oraı «Astana Opera» teatrynda M.Tólebaevtyń atalmysh mýzykalyq jaýhary usynylady. Dırıjer – Qazaqstannyń eńbek sińirgen qaıratkeri, qoıýshy dırıjer Abzal Muhıtdın, dep habarlaıdy QazAqparat.

«Sózsiz, barsha mýzykalyq qaýymdastyq úshin bul eleýli oqıǵa, sebebi «Birjan – Sara» qazaq opera óneriniń asyl murasy bolyp tabylady. 17 aqpan kúni biz buǵan deıingi aýqymynan erekshelenetin rejısserlik nusqany oryndaımyz. Kompozıtor Muqan Tólebaevtyń mýzykasy jaratylysynan óte jarqyn, ásem ári sazdy, onyń ózi vokalmen kásibı turǵydan aınalysqany belgili. «Birjan – Sara» operasynda sazger halyq aqynynyń mýzykalyq dáıeksózderin paıdalanǵan, «Aıtpaı» áni bas keıipker beınesiniń bastamasy bolyp tabylady», - dedi Abzal Muhıtdın.

«Birjan – Sara» operasynyń premerasy 1946 jyly 7 qazanda Abaı atyndaǵy teatrda ótti. Úsh jyldan soń opera avtorlary men oryndaýshylaryna Stalın syılyǵy berildi. 1958 jyly atalmysh spektakl Máskeýdegi Qazaqstannyń óneri men ádebıetiniń on kúndigi kezinde kórsetildi. Shyǵarma shetelde tanymaldylyqqa ıe boldy: Qajym Jumalıevtiń lıbrettosy túrik tiline beıimdelip aýdaryldy jáne 2013 jyly opera Samsýnda, sonymen qatar 2014 jyly Ystanbul, Býrsa, Eskishehır jáne Ankarada kórsetildi.

Esterińizge salar bolsaq, osy operamen 2013 jyly «Astana Opera» teatrynyń tusaýy kesilgen bolatyn. Ony Qazaqstannyń Tuńǵysh Prezıdenti – Elbasy Nursultan Nazarbaev tamashalady. Kóp jyldar boıy qoıylym RF Halyq ártisi, QR Memlekettik syılyǵynyń laýreaty ıÝrıı Aleksandrovtyń qoıylymynda ótti. Sondaı-aq 2014 jyly Sankt-Peterborda Marıın teatrynyń jańa sahnasynda usynyldy. Keıin 2018 jyly teatr Qazaqstan Respýblıkasynyń eńbek sińirgen qaıratkeri Ashat Maemırov pen keńesshi rejısser – Tatarstan Respýblıkasy Memlekettik syılyǵynyń laýreaty Mıhaıl Pandjavıdzeniń mýzykalyq-sahnalyq redaktsııasyn usyndy, onda qoıýshylar qazaq klassıkasynyń stsenografııa stereotıpteri men jekelegen keıipkerlerdiń minez-qulqyn qabyldaýdy buzyp-jarǵan jańasha oqylymyn usyndy.

17 aqpanda sahna tórine kórnekti ártister – Birjan – Beıimbet Tańaryqov, Sara – Qazaqstannyń eńbek sińirgen qaıratkeri Bıbigúl Januzaq, Janbota – Qazaqstannyń eńbek sińirgen qaıratkeri Janat Shybyqbaev, Analyq – Qazaqstannyń eńbek sińirgen qaıratkeri Dına Hamzına, Altynaı – Mádına Islamova, Jıenqul – Erjan Saıpov jáne taǵy basqalary shyǵady.

Aıta keteıik, osy kúni spektakl aıasynda «Astana Operanyń» Nur-Sultan qalasy ákimdigimen birlesken jańa jobasy - joǵary synyp oqýshylaryna arnalǵan «Teatr sabaǵy» ótedi.