«Astana Opera» teatrynda halyqaralyq opera akademııasy ashyldy
Ashylý saltanatynda ıtalııalyq opera ánshileri Mattıa Rossı, Franchesko Mellı, mońǵol opera ánshisi Badral Chýlýýnbaatar, qyrǵyz opera ánshisi Saıan Isın, «Astana Opera» teatrynyń jetekshi solısteri óner kórsetedi.
«Bul árıne eldegi epıdemıologııalyq jaǵdaılarǵa sáıkes uıymdastyrylady. Osy baǵyttaǵy jumystardy aldaǵy kúnderi tamashalaı alasyzdar. Astana Opera halyqaralyq opera akademııasynyń ashylýy – Astana opera trýppasynyń solısterine sondaı aq jas ánshilerge, dırıjerlerge, pıanısterge biliktiligin, kásibı sheberlikterin arttyrý maqsatynda júzege asyp otyr», - QR Mádenıet jáne sport vıtse-mınıstri Nurǵısa Dáýeshov Ortalyq kommýnıkatsııalar qyzmetinde ótken baspasóz máslıhatynda.
«Astana Opera» Memlekettik opera jáne balet teatrynyń dırektory Ǵalym Ahmedıarov álemniń kóptegen tanymal teatrlarynda opera akademııalary bar ekenin eske saldy.
«Búginde Qazaqstanda kásibı vokal mektepteri bar, ol jerde operalyq án aıtý ónerin úıretedi. Bizdiń akademııamyzdyń ereksheligi – konkýrstyq tyńdaý nátıjeleri boıynsha akademııaǵa túsken jas ártister vokaldan sabaq alýdan bólek, eki jyl boıy túrli pánderdi oqıdy, demek bir mezette túrli salada kásibı ósý múmkindigine ıe bolady. Budan bólek, álemniń tanymal ánshiler men mol tájirıbesi bar tálimger ustazdardy sheberlik sabaǵyn ótkizýge shaqyramyz. Ózderińiz biletindeı, operanyń otany – Italııa, sondyqtan klassıkalyq repertýardyń aıtarlyqtaı mańyzdy bóligi ıtalıan tilde jazylǵan týyndylardan turady. Sol sebepti bilim berý baǵdarlamasyna shet tilin úırený de engizildi. Ártister úshin mindetti baǵyttar – sahnalyq qımyl-qozǵalys pen akterlik sheberlik bolady», - dep túsindirdi teatr dırektory.
Sonymen birge, jas ártister teatr spektaklderine qatysyp, rólderdi oryndaı alady, sondaı-aq olar «Astana Opera» kameralyq zaly sahnasynda túrli kontserttik baǵdarlamalar ázirleı alady.