«Astana Opera» teatry elorda kúnine merekelik baǵdarlama ázirlep jatyr
«Astana Opera» teatry elorda kúnine oraı aýqymdy merekelik baǵdarlama ázirledi. Qala turǵyndaryna arnalǵan jarqyn syılardyń biri – álemniń 5 elinen kelgen ataqty ártisterdiń qatysýymen G.Donıtsettıdiń «Don Paskýale» operasynyń tegin kórsetilimi.
Solıster «Astana Opera» teatrynyń sahnasynda ǵana emes, sondaı-aq ashyq alańdardaǵy óner kórsetýge de belsendi daıyndalýda.
Astana kúnin merekeleý aıasynda 4 shilde saǵat 18:00-de teatrdyń Úlken zaly sahnasynda «Astana Opera» Halyqaralyq opera akademııasynyń ashylýyna oraı saltanatty Gala-opera ótedi. Kontsertke Marıandjela Sıtsılııa, maestro Djýzeppe Akýavıva, Franchesko Melı, Mattıa Rossı (Italııa), Lıbýshe Santorısova (Chehııa), Alekseı Shapovalov (Reseı), Badral Chýýlýnbaatar (Mońǵolııa), Saıan Isın (Qazaqstan-Qyrǵyzstan), Baýyrjan Ánderjanov (Germanııa-Qazaqstan), Medet Chotabaev, Jupar Ǵabdýllına, Saltanat Ahmetova (Qazaqstan) jáne basqa álemdik ári qazaqstandyq óner juldyzdary qatysady.
Ánshiler barsha qazaqstandyqtardy alda kele jatqan astana kúnimen quttyqtady.
- Osynaý aıtýly ári jaýapty oqıǵaǵa qatysyp, úlesimdi qosýǵa shaqyrǵany úshin qýanyshtymyn, senim bildirgeni úshin teatr dırektsııasyna alǵys aıtamyn. Týǵan jerińde otandastaryńnyń aldynda sán-saltanaty jarasqan «Astana Opera» zalynda án shyrqaý – árdaıym tebiretip, tolǵandyrary sózsiz. Áriptesterimmen birge asqaq ónerdiń naǵyz meıramyn jasaımyz degen senimdemin, - dep atap ótti tanymal tenor Saıan Isın.
Oryndaýshylardyń juldyzdy quramy Ortalyq qalalyq saıabaqtaǵy Amfıteatr sahnasynda da óner kórsetedi.
«Astana Opera» teatry QR Mádenıet jáne sport mınıstrligi jáne Nur-Sultan qalasynyń ákimdigimen birlesip, 5 shilde saǵat 20:00-de Gaetano Donıtsettıdiń eki bólimdi «Don Paskýale» operasyn usynady.
Basty partııalardy oryndaýshylar: Norına – Lıbýshe Santorısova (Chehııa), Ernesto – Etsýo Doı (Japonııa), Malatesta – Alekseı Shapovalov (Reseı), Don Paskýale – Antýan Bernheım (Shveıtsarııa), Karlıto – Erulan Kámel. Dırıjer – Korrado Valvo (Italııa).
- Bul meniń osyndaı daryndy halyqaralyq ánshiler quramymen alǵashqy yntymaqtastyǵym. Ashyq aspan astynda óner kórsetý kezinde eń qıyny – ánshiler men orkestr arasyndaǵy teńgerimdi tabý. Óz basym operalyq spektaklder úshin ıtalııalyq stıldegi teatrdy qup kóremin, biraq jaz mezgilinde bizde Italııada opera sahnasy retinde qoldanylatyn ejelgi grek jáne ejelgi rım teatrlary bar. «Don Paskýale» – G.Donıtsettıdiń keremet áýezdi konstrýktsııalarǵa, áserli dramatýrgııalyq qurylymǵa, keıipkerlerdiń psıhologııalyq jáne patetıkalyq tereńdigine ıe pisip-jetilgen shyǵarmasy, bul – stılıstıkalyq tutastyqqa qurylǵan jańa romantıkalyq sezimtaldyqtyń nátıjesi, osynyń bári Donıtsettıdi Verdıdiń uly izashary ári on toǵyzynshy ǵasyrdyń birinshi jartysyndaǵy uly ıtalııalyq opera kompozıtorlarynyń biri etedi, - dep atap ótti maestro Korrado Valvo (Italııa).
6 shildede Ortalyq qalalyq saıabaqtaǵy amfıteatr sahnasynda merekelik Gala-kontsert ótedi.
Onda «Astana Opera» teatrynyń jetekshi opera solısteri, hor ártisteri men sımfonııalyq orkestriniń oryndaýynda qazaqstandyq avtorlar men batys eýropalyq klassık kompozıtorlardyń tanymal operalyq arııalary men dýetteri, aspaptyq ári horǵa arnalǵan shyǵarmalary shyrqalady.
Merekelik 6 jáne 7 shilde kúnderi «Astana Opera» Úlken zalynyń sahnasynda afıshaǵa eki birdeı qoıylym – «Kúmis ǵasyr baletteri» toptamasynan M.Fokınniń horeografııasyndaǵy F.Shopenniń mýzykasyna «Shopenıana» men N.A.Rımskıı-Korsakovtyń mýzykasyna «Sheherazada» bir bólimdi baletteri engizildi.