«Astana Opera» teatrynda opera sahnasy jaryq juldyzynyń mereıtoılyq keshi ótti

<p>ASTANA. KAZINFORM &ndash; Qazaqstannyń eń jarqyn ári eń bedeldi opera ánshileriniń biri Maıra Muhamedqyzy sahnadaǵy 30 jyldyq mereıtoıyn keremet kontsertpen atap ótti. Іs-şara QR Mádenıet jáne aqparat mınıstrliginiń qoldaýymen ótti.</p>

Maıra Muhamedqyzy kórermenderge álemdik jáne ulttyq repertýardaǵy týyndylardan turatyn biregeı baǵdarlama usyndy.

Opera sańlaǵynyń oryndaýynda Rıhard Shtraýs, Ferents Lıst, Petr Ilıch Chaıkovskıı syndy uly kompozıtorlardyń operalarynan arııalar, sondaı-aq kontsertke erekshe ulttyq boıaý bergen qazaq avtorlarynyń shyǵarmalary shyrqaldy.

Dırıjerler Abzal Muhıtdın jáne Mádı Ómirzaqtyń jetekshiligindegi «Astana Opera» sımfonııalyq orkestriniń jáne horynyń súıemeldeýimen ótken kontsert onyń kóp jyldyq shyǵarmashylyǵynyń jandy kórinisine aınaldy.

Foto: Mádenıet jáne aqparat mınıstrligi

Aıryqsha atap ótetin nómir — Maıra Muhamedqyzynyń AQSh-taǵy eski dosy Temirjan Erjanovpen birge oryndaǵan «Olieb, solang duliebenkannst» kompozıtsııasy kórermenderdiń zor yqylasyna bólendi. Maıra Muhamedqyzynyń Jorj Bıze, Sharl Gýno jáne Djýzeppe Verdıdiń operalarynan arııalardy tebirene oryndaýy onyń emotsııalyq tereńdigin jáne ártistik sheberligin aıqyn kórsetti. Sondaı-aq sımfonııalyq orkestr men hordyń súıemeldeýimen oryndalǵan Karl Orftyń «Karmına Býrana» shyǵarmasynyń «O Fortuna» úzindisinen keıin de kórermender dý qol shapalaq jaýdyrdy.

Qazaqstan Respýblıkasynyń eńbek sińirgen ártisi, kóptegen syılyqtardyń laýreaty jáne bedeldi marapattardyń ıegeri retinde Maıra Muhamedqyzy birneshe jyl boıy qazaq opera ónerin álemdik arenada tanystyrdy.

Rejısseri Mıhaıl Pandjavıdze bolǵan kontsertke teatrdyń balalar hory, «Astana Operanyń» jetekshi balet solısteri Ánel Rústemova, Oljas Tarlanov, Dıas Qurmanǵazy, áıgili qazaqstandyq ártister Oraz Muhamedıar (tenor), Jumabek Qańtarbaev (tenor), Aıbek Qanatbek (barıton), Ramına Satybaldy jáne taǵy basqalary qatysty.

Saltanatty kesh «Domalaq Ana» operasynan (T.Jarmuhamet) toı kórinisimen aıaqtaldy.