«Astana Opera» Táýelsizdiktiń 30 jyldyǵyna oraı Almatyda óner kórsetedi
«Astana Opera» balet trýppasynyń ónerin tamashalaý – almatylyqtar úshin árdaıym aıtýly oqıǵa. Pandemııanyń saldarynan mundaı kezdesýler sırep ketti, degenmen onyń ózi kóńildi bir marqaıtyp tastaıtyn. Elordalyq ártisterdiń ótken jolǵy gastroldik sapary kezinde kópshiliktiń kóńili qatty tolqydy. Ókinishke qaraı, biraz adamdar kele almaı, qapy qalǵany da belgili. Endi almatylyq kórermenderdiń balet óneriniń tunyǵynan sýsyndap, keremet áser alýǵa múmkindikteri bar.
Ekikúndik gastroldik baǵdarlama aıasynda «Astana Opera» jetekshi solısteriniń, atap aıtsaq, Qazaqstannyń eńbek sińirgen qaıratkerleri Baqtııar Adamjan, Áıgerim Beketaeva, Ánel Rústemova, Mádına Basbaeva, Gaýhar Ýsına, Erkin Rahmatýllaev, sondaı-aq Oljas Tarlanov pen Arman Ýrazov, solıster – Shuǵyla Ádephan, Serik Naqyspekov, Anastasııa Zaklınskaıa, Daler Zaparov, Móldir Shákimovanyń oryndaýynda N.Rımskıı-Korsakovtyń
mýzykasyna «Sheherazada» bir bólimdi horeografııalyq dramasy jáne Gala-balet kórsetiledi.
«Astana Opera» balet trýppasynyń kórkemdik jetekshisi, Reseıdiń Halyq ártisi Altynaı Asylmuratovanyń negizgi oıy – ónerde óz ornyn oıyp turyp alǵan bıshilermen birge
solardyń ókshesin basyp kele jatqan jas oryndaýshylardyń óner kórsetýi. Sol sebepti
baǵdarlamada kópshilik kórermen Baqytgúl Ispanova, Danııar Jumataev, Dııas Qurmanǵazy, Adelına Tólepova, Jánibek Ahmedıev, Jaqsylyq Saýqymbekovti kóre alady.
Bul joly ártister Gala-balettiń klassıkalyq jáne zamanaýı qoıylymdarynan túrli kórsetilimder engizilgen eki nusqasyn daıyndady. Kórermenderdiń nazaryna M.Petıpanyń horeografııasyndaǵy A.Glazýnovtyń «Raımonda» baletinen Gran-pa, R.Petıdiń horeografııasyndaǵy L.Delıbtiń «Koppelııa» baletinen Frantstyń varıatsııasy, S.Legat pen N.Legattyń qoıylymyndaǵy I.Baıerdiń «Qýyrshaqtar perisinen» trıo, sondaı-aq P.Chaıkovskııdiń «Aqqý kóli» jáne R.Drıgonyń «Talısman» (M.Petıpanyń
horeografııasy) baletterinen Pa-de-de usynylady. Sonymen qatar ártister R.Rebektiń horeografııasynda «Bethoven – Máńgilik – Mahabbat», P.Bananyń qoıylymyndaǵy Q.Shildebaevtyń mýzykasyna «Dala úni» jáne F.Shopenniń «Eles bal» (D.Brıantsevtyń horeografııasy) baletterinen dýetter oryndaıdy.
Jeltoqsan aıynyń basynda ártister gastroldik saparmen «Astana Balet» sahnasynda óner kórsetken edi. Áıgerim Beketaeva Zobeıdanyń rólin alǵash ret somdap, juldyzy
jarqyraı tústi. Jáne de «Qýyrshaqtar perisi» baletinen úzindi bılegen Baqytgúl Ispanova men Danııar Jumataev úshin de debıýt oryn aldy. «Eles bal» baletinen dýette Jaqsylyq Saýqymbekov te alǵash óner kórsetti, al Anastasııa Zaklınskaıa «Bethoven – Máńgilik –
Mahabbat» baletinen dýette alǵash ret sahna tórine shyqty. Jalpy, gastroldik baǵdarlamada teatrdyń barlyq solısteri ózderiniń sheberlikterin kórsete aldy.
Almatyda ótetin ekikúndik sapar kezinde kórermender ekinshi bólimde kórsetiletin N.Rımskıı-Korsakovtyń mýzykasyna «Sheherazada» bir bólimdi horeografııalyq dramasyn tamashalaı alady. «Myń bir tún» ertegisinen shabyt alǵan klassıkalyq romantıkalyq balettiń negizin qalaýshy Mıhaıl Fokın spektakldi sonaý 1910 jyly qoıǵan bolatyn.
Osylaısha, ol teatr álemin tańdaı qaqtyrdy. Spektakl «Orys mezgilderi» festıvali aıasynda Parıjde «Grand Opera» sahnasynda qoıyldy. Bir ǵasyr ótkennen keıin Reseıdiń halyq ártisi Andrıs Lıepa «Astana Opera» teatrynda qoıylymdy qaıta jańǵyrtyp sahnalady.
N.Rımskıı-Korsakovtyń eliktirer mýzykasy, sonymen qatar Lev Baksttyń syzbalary negizinde qoıýshy sýretshi Anatolıı Nejnyı jáne kostıýmder boıynsha sýretshi Elena Netsvetaeva-Dolgalevanyń qolymen qaıta jasalǵan tarıhı dekoratsııalar men kostıýmder kórermendi shyǵys ertegisindegi ǵajaıyp álemge jetelep, «Astana Opera» ártisteriniń sheberligi men daryny esten ketpes áser syılaıtyny sózsiz.