«Astana Opera» Italııada: kórermeniń qoshemeti kesh boıy úzilmedi

ASTANA. QazAqparat - «Astana Opera» ártisteri Italııanyń belgili «Karlo Felıche» teatrynda óner kórsetti. Elordalyq ártisterdiń oryndaýynda «Parıj Qudaı anasynyń sobory» baletin tamashalaǵan kórermen tolassyz shapalaq soǵyp, yqylastaryn bildirip otyrdy. Bul týraly QR Mádenıet jáne sport mınıstrliginen málim etti, dep habarlaıdy QazAqparat.

Italııaǵa gastroldik spar «Rýhanı jańǵyrý» baǵdarlamasy aıasynda «Jahandaǵy zamanaýı qazaqstandyq mádenıet» jobasyn júzege asyrý maqsatynda QR Mádenıet jáne sport mınıstrliginiń bastamasymen ótýde.

Qos teatr arasyndaǵy seriktestik 2015 jyly bastaldy. «Astana Opera» teatrynyń qoıylymdary men ártisterdiń jeke óner kórsetýleri Genýıada úlken tanymaldylyqqa ıe. Osyndaı qajettilik spektaklderdiń joǵary sapasymen túsindiriledi - ujym qoıylymdaryn tek Eýropada ǵana emes, sonymen birge Amerıkada, Azııada usynyp júr. Kórermenderdi qoıylymdardyń jańa úlgisi men stsenografııasy, kostıýmderdiń keremet kórkemdik deńgeıi qyzyqtyrýda.

Qazaqstandyq trýppa Italııada kezekti ret óziniń sheberligi men ártistik qabiletin kórsetti. «Parıj Qudaı anasynyń sobory» spektakli aty ańyzǵa aınalǵan frantsýz horeografy Rolan Petıdiń 1965 jylǵy túpnusqa qoıylymyn qaıta jandandyrdy.

Birinshi kúni spektaklge 2 myń kórermen keldi, zalda ıne shanshar jer bolmady. Baletqumarlar qoıylymdy shattyqpen qabyldap, qoshemeti men jyly sózderin aıamady. Kesh boıy «Bravo» degen daýystar úzilmedi. «Karlo Felıche» sahnasynda Kvazımodo partııasyn halyqaralyq baıqaýlardyń bas júlde ıegeri Baqtııar Adamjan oryndady. Esmeralda rólinde QR eńbek sińirgen qaıratkeri Áıgerim Beketaeva jarqyrady. Feb beınesin halyqaralyq baıqaýlardyń laýreaty Oljas Tarlanov kórsetse, Klod Frollony - Arman Orazov somdady.

24 qarasha kúni jergilikti ýaqyt boıynsha saǵat 15.30 ben 20.30-da qazaqstandyq trýppa «Astana Opera» teatry mýzykanttarynyń qatysýymen, «Karlo Felıche» sımfonııalyq orkestriniń súıemeldeýimen M.Jarrdyń «Parıj Qudaı anasynyń sobory» baletin qaıta sahnalady.

Usqynsyz búkir adamnyń partııasyn Qazaqstannyń eńbek sińirgen qaıratkeri Rústem Seıitbekov oryndady. Sulý Esmeralda rólin Qazaqstannyń eńbek sińirgen qaıratkeri Mádına Basbaeva, Klod Frollo rólin - Serik Naqysbekov somdady, al Febti Erkin Rahmatollaev oınady.