Astana Opera-nyń túlekteri álemdik arenada suranysqa ıe
«Astana Opera» teatrynyń solısi, «Daryn» memlekettik jastar syılyǵynyń ári halyqaralyq baıqaýlardyń laýreaty Azat Málik jýyrda Býdapeshten oraldy, ol onda Vengrııa memlekettik opera teatrynyń shaqyrýymen Dj.Pýchchınıdiń «Bogema» spektakliniń toptamasynda Shonardyń partııasynda zor tabyspen óner kórsetti.
Akademııa túleginiń debıýti Ferents Lısttiń akademııasynda magıstratýrada oqyp júrgen kezinde oryn alǵan bolatyn. Ol A.Ponkellıdiń «Djokonda» operasyndaǵy Barnabanyń rólin, odan keıin J.Bızeniń «Karmen» operasynda Eskamılony oryndady.
Ol 2021 jyly Eva Martonnyń halyqaralyq vokalıster baıqaýynyń laýreaty, II syılyq ıegeri atanǵanynda Dj.Pýchchınıdiń «Bogema» operasynda Shonardyń rólin oryndaýǵa shaqyrtý aldy.
– «Bogema» – álemdegi eń tanymal opera, sondyqtan Vengrııa teatrynyń zaly árdaıym qýanyshty kórermenderge toly bolady. Jeltoqsan-qańtar aılaryna bıletter jazda túgeldeı satylyp ketti. Men Vengrııa memlekettik opera teatrynda 15-ten astam spektaklde án aıtyp úlgerdim, sondaı-aq týǵan teatrym «Astana Opera» sahnasyna sýretshi Marseldiń rólinde shyǵamyn, – dedi Azat Málik.
26 qańtarda Frantsııanyń Belfor qalasynda gastroldik óner kórsetý aıasynda ol «Astana Operanyń» jetekshi solısi, Qazaqstannyń eńbek sińirgen qaıratkeri Bıbigúl Januzaqpen birge ónerin pash etedi.
Frantsýz jurtshylyǵy úshin daıyndalǵan kontsert baǵdarlamasyna Dj.Pýchchını, F.Legar, E.V.Korngold, Ý.Djordanonyń, sondaı-aq otandyq kompozıtorlardyń týyndylary enedi.
Eýropalyq kórermen Muqan Tólebaev («Baqyt valsi»), Serik Erkimbekov («Jer aspan», «Darhan dala») syndy qazaqstandyq maıtalman avtorlardyń shyǵarmashylyǵymen, sondaı-aq Ǵazıza Jubanovanyń óńdeýindegi «Aqqýraı», «Alqońyr» tárizdi halyq mýzyka ónerimen tanysa alady.