Astana oqýshylary Qarttar úıindegi qarııalarǵa qurmet kórsetti
13:07, 14 Qazan 2010
ASTANA. Qazannyń 14-i. QazAqparat /Jasulan Amanbaıuly/ - Búgin elordalyq mektep oqýshylary Astanadaǵy qarttar úıinde «Urpaq baılanysy» qaıyrymdylyq aktsııasyn ótkizdi.
Merekelik keshte mektep jasyndaǵy balǵyndar kontserttik qoıylym barysynda biri óleń aıtyp, ekinshisi bı bılese, úshinshisi naqyshyna keltire óleńder oqydy. Keıin ózderi jasap shyǵarǵan qoldanbaly óner týyndylary men syılyqtaryn syıǵa tartyp, qarttarǵa qoshemet kórsetti.
Jalpyulttyq «Birligimiz jarasqan» sharasy aıasynda uıymdastyrylǵan ıgi bastamany Qarttar kúnine oraı Qazaqstan stýdentteriniń alıansy jáne Memlekettik qyzmet mektebiniń belsendileri kótergen bolatyn.
«Bizdiń búgingi kezdesýimiz mektep oqýshylaryn qarııa kisilerdi syılaýǵa jáne qasterleýge, olarǵa qamqorlyqpen jáne mahabbatpen qaraýǵa úıretedi», - deıdi Qazaqstan stýdentteriniń alıansy kóshbasshysynyń orynbasary Rafhat Bozbalıev.