Astana muǵalimderiniń 99,7 paıyzy koronavırýsqa qarsy ekpe alǵan

NUR-SULTAN. QazAqparat - Elorda ákimdiginde jańa oqý jylynyń qalaı bastalatyny týraly aıtyldy, dep habarlaıdy QazAqparat qala ákimdiginiń resmı saıtyna silteme jasap.

Qaladaǵy oqý oryndary epıdemıologııalyq jaǵdaıdyń qıyndyǵyna qaramastan dástúrli formatta oqýǵa tolyq daıyn.

1 qyrkúıekten bastap bilim berý uıymdary jańa sanıtarlyq erejeler boıynsha jumys isteıdi.

Qala mektepterinde oqýshylar men muǵalimderdiń qaýipsizdigi men densaýlyǵyn saqtaýdy qamtamasyz etý boıynsha keshendi sharalar qabyldandy.

«Búgingi tańda muǵalimderdiń 99,7%-dan astamy jáne tehnıkalyq qyzmetkerlerdiń 98,9% ekpe aldy. Barlyq bilim uıymdary Ashyq júıesine 100% qosylǵan. Búkil bilim uıymdary sanıtarlyq talaptarǵa sáıkes dezınfektsııalyq quraldarmen jáne dári-dármekpen qamtamasyz etilgen», - dep atap ótti Nur-Sultan qalasy bilim basqarmasynyń basshysy Shákárim Seısenbaı ákimdiktiń baspasóz ortalyǵynda ótken brıfıngte.

Brıfıng barysynda Nur-Sultan qalasynyń bas memlekettik sanıtar dárigeriniń orynbasary Janna Pirálıeva oqý oryndaryndaǵy jańa jaǵdaılardy túsindirdi.

«Dezınfektsııalyq is-sharalar, ylǵaldy tazalaý, úı-jaılardy jeldetý jáne kvartstaý, termometr, kúndelikti áleýmettik qashyqtyq, mektep muǵalimderi men tehnıkalyq qyzmetkerlerdi vaktsınalaý, aýysymdyq oqý protsesin uıymdastyrý, ashananyń, medıtsınalyq kabınetterdiń jumys rejımi jáne betperde rejımin saqtaý júrgiziledi. Barlyq bilim uıymdary sanıtarlyq talaptarǵa sáıkes dezınfektsııalyq quraldarmen jáne dári-dármekpen qamtamasyz etilgen», - dedi ol.