«Astana Motors» aýyr júk kólikterin qurastyra bastady

ASTANA. QazAqparat - «Astana Motors» kompanııasynyń avtoqurastyrý kásipornynda MAZ avtotehnıkasynyń óndirisi iske qosyldy, dep habarlaıdy QazAqparat kompanııanyń baspasóz qyzmetine silteme jasap.

2016 jyldan bastap «Astana Motors» kompanııasy Mınsk avtomobıl zaýyty men «MAZ» ashyq aktsıonerlik qoǵamynyń Qazaqstan Respýblıkasyndaǵy resmı dıleri bolyp tabylady.  Resmı dıler mártebesin alǵan soń, «Astana Motors» kompanııasynyń Almaty qalasyndaǵy avtoqurastyrý kásiporny mashına jıyntyqtaryn alyp, aýyr júk kólikterin qurastyrýǵa kirisip ketti. Jarty jyl ishinde kásiporyn barlyq protsesti pysyqtap, óndiristiń tolyq tsıklyn meńgerip shyqty.

Búginde avtoqurastyrý kásiporny dánekerleý, qurastyrý jáne boıaýdyń tolyq tsıklyn júzege asyryp, MAZ júk kólikteriniń serııalyq óndiristerine kirisip ketti. Kásiporynda júkti ózi túsiretin MAZ 5516H5 jáne 6501N9 modelderi shyǵarylady, olardyń júk kótergishtigi 20 tonnaǵa deıin jetedi.

Kásiporyn konveıerinen shyqqan MAZ avtotehnıkasy Evro-4, Evro-5, Evro-6 standarttaryna jáne qazaqstandyq zańnamaǵa saı keledi. Avtoóndirýshi talaptaryna sáıkes, kompanııa avtotehnıkaǵa kepildik jáne servıstik qyzmet kórsetedi.

«Qazaqstandaǵy seriktesti tańdaýda biz kompanııanyń bedeline jáne avtotehnıka óndirý tájirıbesine súıendik jáne búgin atqarylǵan jumystardyń tamasha nátıjesin kórip otyrmyz.  Qazaqstan Respýblıkasy aýmaǵynda shyǵarylǵan MAZ kólikteri barlyq tehnıkalyq parametrlerge saı keledi, sapaly, senimdi ári Mınsk avtomobıl zaýytynda qurastyrylǵan avtotehnıkadan esh aıyrmashylyǵy joq», - dep atap ótti «MAZ» ashyq aktsıonerlik qoǵamynyń kommertsııalyq dırektorynyń orynbasary Sergeı Zaharevıch.

Bıyl kompanııa ózdiginen júk túsiretin 100 kólik shyǵarýdy josparlaýda. 2018 jyldan bastap qurastyrylatyn tehnıkanyń modeldik qatary keńeıedi, al óndiris kólemi 350 danaǵa jetedi.