Astana men Tashkenttiń arasyna taǵy bir ushaq qatynaıdy
12:33, 20 Mamyr 2023
ASTANA. QazAqparat - Astana men Tashkenttiń arasyna taǵy bir ushaq qatynaıdy, dep habarlaıdy QazAqparat.
QR Indýstrııa jáne ınfraqurylymdyq damý mınıstrliginiń Azamattyq avıatsııa komıteti Qazaqstandyq áýe kompanııalarmen birlesip halyqaralyq reıster sanyn ulǵaıtý jáne ushý geografııasyn keńeıtý boıynsha jumys júrgizýde.
«Máselen, 2023 jylǵy 3 shildeden bastap «FlyArystan» áýe tasymaldaýshysy A–320 tıpti áýe kemelerinde aptasyna 2 reıs jıiligimen (dúısenbi, sársenbi) Astana-Tashkent baǵyty boıynsha tikeleı turaqty jolaýshylar reısterin ashýdy josparlap otyr.
Qazaqstan men Ózbekstan arasyndaǵy reıster sanynyń artýy Qazaqstan men Ózbekstan arasyndaǵy saýda-ekonomıkalyq, mádenı jáne týrıstik qatynastardyń odan ári damýyna yqpal etetin bolady», - dep jazdy vedomstvodan.