Astana men taǵy birqatar óńirde ekinshi aýysym oqýshylary onlaın oqıdy

ASTANA. QazAqparat - Búgin Qazaqstannyń segiz óńirinde ekinshi aýysym oqýshylary sabaqty qashyqtan oqıdy, dep habarlaıdy QazAqparat.

9 qańtar kúni qolaısyz aýa raıyna baılanysty Astana qalasynda ekinshi aýysymnyń 0-11 (12) synyp oqýshylary, kolledjderdiń 1-2 kýrs stýdentteri qashyqtan oqytý formatyna aýystyryldy.

Qostanaı oblysynyń Rýdnyı qalasynda, Amangeldi, Qostanaı, Jitiqara, Jangeldın, Qarasý, Áýlıekól, Beıimbet Maılın, Fedorov aýdandarynda jáne oblys ortalyǵynda 0-11 synyp oqýshylary mektepke barmaıdy.

Sondaı-aq Soltústik Qazaqstan oblysynda, Abaı oblysynyń Semeı qalasynda, Aqmola oblysynyń ortalyǵy Kókshetaý qalasynda da ekinshi aýysymdaǵy 0-11 synyp oqýshylary men kolledjdiń 1,2 kýrs stýdentteri úıden bilim alady.

Shyǵys Qazaqstan oblysynyń Glýbokoe jáne Kúrshim aýdandarynda jáne Pavlodar qalasynda 0-11 synyp oqýshylary, Batys Qazaqstan oblysynyń ortalyǵy Oralda 1-4 synyp oqýshylary onlaın oqıdy.

Eske sala keteıik, búgin tańerteń 8 óńirde oqýshylar aýa raıyna baılanysty mektepke barǵan joq.