Astana men Kókshetaý mektepterindegi oqýshylar keptelisi: Bilim basqarmalary basshylaryna shara qoldanylady
«Elimizdegi bilim berý uıymdaryn jańa oqý jylyna daıyndaý barysynda birqatar jumys atqaryldy. Atap aıtsaq, bıyl 260 mektepte kúrdeli jóndeý júrgizý josparlanǵan bolatyn. Búgingi kúni 200-ge jýyq nysanda jumystar aıaqtalyp, sabaqtar bastalyp ketti. Osylaısha, 150 myń oqýshy jóndelgen mektep ǵımarattaryna kirdi. Bıylǵy oqý jylynda barlyǵy 132 myń oryndyq 154 mektepti salý josparlanǵan. Jańadan salynǵan 55 oryndyq 39 mektep paıdalanýǵa berildi. Bul 12 apatty jáne 29 úsh aýysymdy mekteptiń máselesin sheshti. Bilim uıymdaryndaǵy mańyzdy jumystardyń biri – oqý-tárbıe protsesin tıimdi uıymdastyrý. Bul - tikeleı mektep basshylarynyń mindeti. Olardyń jumysyn qadaǵalaý ári sapaly uıymdastyrýyn baqylaý - bilim bólimderi men basqarmalardyń mindeti. Sońǵy kúnderi Astana men Kókshetaý qalalaryndaǵy mektepterde oqýshylardyń úziliske shyqqanda jáne syrtqy kıimderin alý kezinde kezek saqtalmaı, ishki tártipti óreskel buzý faktilerin kórip otyrmyz. Osynyń saldarynan sabaq protsesine nuqsan keldi. Mundaı keleńsizdikterge qalaısha jol berildi?» - dedi ol Oqý-aǵartý mınıstrligindegi keńeste.
Osydan keıin Astanadaǵy №71 mektepte bolǵan jaǵdaıǵa qatysty qalalyq bilim basqarmasynyń basshysy Qasymhan Senǵazyev baıandama jasady.
«Jalpy qalada 255 myńnan astam balany oqytatyn 169 mektep jumys isteıdi. Osy mektepterdiń ishinde 8 mektep úsh aýysymdy rejımde, 18 mektep shamadan tys rejımde jumys jasaıdy. Oqý protsesin uıymdastyrý boıynsha mektep basshylarymen tıisti uıymdastyrý is-sharalaryn qabyldadyq. Atalǵan №71 mektep boıynsha mektep ákimshiligimen de, Bilim basqarmasy tarapynan da tıisti uıymdastyrý is-sharalaryn júrgizip jatyrmyz. Atap aıtar bolsaq, sabaq kestesi qaıta qaraldy. Mektep ákimshiligi tarapynan mekteptegi ár qabatta kezekshilik uıymdastyryldy. Kıim iletin jerde balalar kóp jınalady. Sol kıim iletin jerdiń jumysy qaıta qaraldy. Kıim iletin jer buryn bir jerde bolsa, qazir ár qabatta ornalastyryldy. Mektepke kiretin jáne shyǵatyn 1 esikke qosymsha 3 esik qosyldy», - dedi Qasymhan Senǵazyev.
Basqarma basshysynyń atap ótýinshe, búginde qalada 14 mekteptiń qurylysy júrgizilip jatyr. Onyń 11 osy oqý jylynda paıdalanýǵa beriledi. Munan bólek jaıly mektep baǵdarlamasy aıasynda 90 myń oryndyq 24 mektep salynýda. №71 mektepke taqaý 12 oryndyq 3 mekteptiń qurylysy júrgizilýde. Bul mektepter 2024-2025 oqý jyldarynda paıdalanýǵa beriledi.
Al Aqmola oblystyq bilim basqarmasynyń basshysy Shoqan Orazalın keleńsiz jaǵdaı Kókshetaý qalasyndaǵy №1 mektepte bolǵanyn aıtady.
«Bul mektep qalanyń ortasynda ornalasqannan keıin bala kóp keledi. Biraq, mektep ákimshiliginen ketken qatelik bar. Sabaq bitkende bir mezette búkil balany dálizge shyǵaryp jibergen», - dedi ol.
Qanybek Jumashev osyndaı máselelerdi qatań baqylaýda ustaý jóninde oblystyq bilim basqarmalaryna tamyz aıynda ótken arnaıy jınalystarda da eskertilgenin aıtady.
«Joǵarda atalǵan faktiler mektep basshylarynyń óz mindetterin atqarýda jaýapsyzdyq tanytqanyn jáne bilim bólimderi men basqarmalar tarapynan baqylaýdyń álsizdigin kórsetedi. Aldaǵy ýaqytta mundaı jaǵdaı eshbir mektepte qaıtalanbaýy tıis. Sondyqtan, Astana qalasy jáne Aqmola oblysy ákimderiniń atyna bilim basqarmalary basshylaryna qatysty baqylaýdy tómendetkeni úshin tártiptik shara qoldaný jóninde Oqý-aǵartý mınıstrliginen usynym-hat joldaıtyn bolamyz», - dedi Orta bilim berý komıtetiniń tóraǵasy.