Astana men Dýshanbe arasyndaǵy áýe qatynasy qaıta jandanady

ASTANA. QazAqparat – Astana men Dýshanbe arasyndaǵy áýe qatynasy qaıta jandanýy múmkin. Bul týraly Qazaqstan-Tájikstan bıznes forýmynda Tájikstan Premer-Mınıstriniń orynbasary Sýlaımon Zıezoda aıtty, dep habarlaıdy QazAqparat tilshisi.

Onyń atap ótýinshe, eki eldiń arasynda kóterme-taratý ortalyqtarynyń qurylysyna qatysty kelisimderge qol qoıylǵan. Atalǵan ortalyqtar Qazaqstanǵa qajetti jemis-kókónis ónimderin jetkizýdi ulǵaıtýǵa múmkindik beredi.

Sonymen qatar Tájikstan Úkimet basshysynyń orynbasary ótken jyly 2 mln 700 myń tonna jemis-kókónis, mıllıon tonna jemis-jıdek pen júzim jınaǵandaryn atap ótti. Onyń ishinde Qazaqstanǵa 26 myń tonna júzim eksporttaldy. Aýylsharýashylyq taýarlaryn jetkizý qurylymy jyldan jylǵa artyp ta kele jatyr.

«Búgin bıznes forýmda úkimetaralyq komıssııa Dýshanbe men Astana arasynda áýe qatynasy qaıta jandanatyny jaıly aıtty. Menińshe, bul másele sheshiledi», - dedi Sýlaımon Zıezoda forým aıasynda BAQ ókilderine bergen suhbatynda.