Astana men BQO stýdentteri «Rýhanı jańǵyrý» baǵdarlamasy aıasynda pikir almasty

ORAL. QazAqparat  - Astanadaǵy L.Gýmılev atyndaǵy Eýrazııa ulttyq ýnıversıtetiniń stýdent jastary Oral qalasynda M.Ótemisov atyndaǵy Batys Qazaqstan memlekettik ýnıversıtetinde boldy, dep habarlaıdy QazAqparat tilshisi.

Elordalyq jastar «Rýhanı jańǵyrý» baǵdarlamasy aıasynda «Meniń elim» atty tarıhı-ólketaný jobasy boıynsha Aq Jaıyq óńirine arnaıy keldi.

86 jyldan astam tarıhy bar M.Ótemisov atyndaǵy Batys Qazaqstan memlekettik ýnıversıtetiniń oqý-ádistemelik jumys jónindegi prorektory, tarıh ǵylymdarynyń doktory Áset Tasmaǵambetovtiń aıtýynsha, joba maqsaty - stýdent jastar arasynda elimizdiń kórikti jerleri men tarıhı murasyn dáripteı otyryp, patrıottyq tárbıe berýdi nyǵaıtý.

Osynyń aldynda Túrkistan, Semeı, Aqtóbe sııaqty tarıhı óńirlerdi aralaǵan elordalyq jastar Oraldan keıin Atyraý, Aqtaýǵa bet burmaq.
 

Astanalyqtar eki kún boıy oblystyq tarıhı-ólketaný, «Rýhanı jańǵyrý» mýzeıleri jáne M.Ótemisov atyndaǵy BQMÝ-da bolyp, ózderi sekildi jastarmen jaqynyraq tanysty. Dóńgelek ústel basynda ózekti máselelerdi talqylap, birge kontsert qoıdy, tarıhı taqyrypta óleńder oqydy. Ýnıversıtettegi «Rýhanı jańǵyrý» ınstıtýtynda bolyp, pikir alysty.

Qos JOO jastary aldaǵy ýaqytta tyǵyz baılanys jasap, pikirtalas, KTK saıystaryn birge ótkizýge ýaǵdalasty.

«Elbasynyń bıylǵy Joldaýynyń basty jańalyǵynyń biri - 2019 jyldyń «Jastar jyly» bolyp jarııalanýy. Elordalyq jastar qolǵa alǵan jobanyń maqsat-mindeti osymen tolyq úndesedi. Eki ýnıversıtettiń jastary osylaısha belsendi bolyp, eldiń bolashaǵy úshin birge jumys jasasa, odan qos tarap ta utady. Memleket basshysy ár Joldaýynda, memlekettik baǵdarlamalarynda jastar máselesin nazardan tys qaldyrǵan emes. El bilimdi urpaǵymen máńgi jasaıdy. Endeshe, jastar da uly dalanyń patrıoty retinde Qazaqstannyń damýyna súbeli úlesterin qosa alady», - dedi QazAqparat tilshisine Áset Tasmaǵambetov. 

    

Foto: Rafhat Halelov