Astana men BQO arasyndaǵy yntymaqtastyq máselesi talqylandy
Elordanyń 20 jyldyǵyna oraı Astananyń BQO-daǵy kúnderi aıasynda uıymdastyrylǵan sharany ashqan oblys ákiminiń birinshi orynbasary Igor Steksov mundaı baılanystyń mańyzy zor ekendigin atap kórsetti.
Astana men BQO arasynda buǵan deıin de tıimdi qarym-qatynasqa jol qoıylǵan bolatyn. Mysaly, «EKSPO-2017» kórmesi pavılonyn salýǵa batysqazaqstandyq «Steklo Servıs» JShS qatyssa, oǵan qosa elordada kóptegen kásiporyndardyń fılıaldary qurylyp, jumys jasaýda.
Elbasy tapsyrmasyna sáıkes óńiraralyq kooperatsııa aıasynda ótken jyly batysqazaqstandyq delegatsııa bes óńirde bolsa, mundaı deńgeıdegi kezdesýler bıyl da jalǵasýda. Sonyń ishinde aqpan aıynda oblys ákimi Altaı Kólginov bastaǵan delegatsııa Astanada bolyp, memorandýmdarǵa qol qoıyldy.
Astana qalasy ákiminiń orynbasary Ermek Amanshaev elordanyń 20 jyldyǵyna oraı Memleket basshysynyń tapsyrmasyna sáıkes keshendi is-sharalar jospary jasalyp, kóptegen sharalardyń qolǵa alynyp jatqanyn jetkizdi. Sonyń ishinde astanalyq delegatsııa óńirlerde bolyp, ekonomık ajáne basqa salalardaǵy yntymaqtastyqty odan ári damytý baǵytynda kelisimder jasalýda.
Kezdesý barysynda Astanada júzege asyrylyp jatqan naqty jobalar tanystyryldy. Elbasy tapsyrmasyna sáıkes qolǵa alynǵan «Aqyldy qala» jobasyn keńinen engizýdiń máni zor. Álemde adamdardyń basym bóligi qaı jerde ómir súrý qolaılyb olsa, sonda turǵandy qalaıdy. Aldaǵy ýaqytta el men el emes, qala men qala kóbirek básekelestikke túsedi. Sondyqtan qalalardyń jan-jaqty damyǵany kerek. Ásirese, týrızm salasyn, shahardaǵy ózge de qyzmet kórsetý ortalyqtarynyń jumysyn tsıfrlandyrý, sol arqyly týrıster men turǵyndardyń smartfon arqyly tolyqtaı aqparat alýyn qamtamasyz etý mańyzdy.
Qazirgi tańda elordada mundaı jumystardyń bári Astanany Eýrazııa keńistigi boıynsha osy zamanǵy óskeleń talaptarǵa saı jan-jaqty damyǵan, jetekshi qalalar qataryna qosý baǵytynda qolǵa alynýda.
Kezdesý sońynda Astana men BQO ákimdikteri arasynda yntymaqtastyq jónindegi memorandýmǵa, basqa da kelisimderge qol qoıyldy.
Aıta keteıik, 18 mamyr kúni elordada Astana men Batys Qazaqstan oblysynyń ákimderi Áset Isekeshev pen Altaı Kólginov jańa tynymbaqtyń (skverdiń) qurylysymen tanysty. Qazirgi kezde 1,4 gektar aýmaqta qurylys pen abattandyrý jumystary qarqyndy júrgizilýde. Batysqazaqstandyqtar elordanyń 20 jyldyǵyna oraı tartý etetin tynymbaqta Keńes odaǵynyń batyry Mánshúk Mámetovanyń eskertkishi ornatylatyn bolady.